گروپە چەکدارەکانی سەر بە تورکیا لە شاری سەرێکانێی ڕۆژاڤای کوردستان، چوار هاوڵاتیی کوردیان ڕادەستی هەواڵگریی تورکیا کردووە و هاوڵاتییەکان گواستراونەتەوە بۆ ناو خاکی ئەو وڵاتە.
بنەماڵەیەکی ئاوارەی سەرێکانی ڕایگەیاند، کوڕەکەیان بە ناوی جومعە ئەحمەد ئیزۆ لەگەڵ سێ هاووڵاتی دیکە بە ناوەکانی مەحمود هۆبۆ، وەڵات هۆبۆ و ئەحمەد قاسم ئەسعەد، لە کاتی سەردانیکردنی گوندەکەیان لە لایەن چەکدارانی ناسراو بە پۆلیسی سەربازی، دەستبەسەر کراون.
گوتووشیانە، هاوڵاتییەکان کاتێک ویستوویانە بچنەوە سەر ماڵ و حاڵی خۆیان، لە نزیک گوندی ئەلعالیە ڕفێندراون و پۆلیسی سەربازیی سەرێکانی دەستبەسەرکراوەکانی ڕادەستی دەزگای هەواڵگریی تورکیا کردووە، دواتر گواستراونەتەوە بۆ ناو خاکی تورکیا.
دەشڵێن، تاوەکو ئێستا چارەنووسی هاوڵاتییەکان نادیارە، بنەماڵەکانیان هیچ زانیارییەکیان لەسەر شوێن و تەندروستییان نییە.