ئەندامێکی ئەنجومەنی نوێنەرانی عێراق لە نوسراوێکی فەرمیدا داوا لە وەزیری دارایی عێراق دەکات، هەماهەنگی بکات بۆ دەستپێکردنەوەی پلەبەرزکردنەوەی فەرمانبەرانی سڤیل و مامۆستایانی هەرێمی کوردستان و جێگیرکردنی شایستەکانیان لە بودجەی ساڵی 2026دا.
تێیدا هاتووە: "دەمانەوێت سەرنجتان رابکێشین بۆ ئەوەی فەرمانبەرانی مەدەنی و مامۆستایان لە هەرێمی کوردستان لە ساڵی 2016ـەوە لە مافە یاساییەکانیان بێبەش کراون کە پلەبەرزکردنەوەی ساڵانەیە، سەرەڕای ئەوەی ئەم مافانە بەپێی یاسا بەرکارەکان مسۆگەر کراون."
لە کۆتایی نوسراوەکەدا، ئەو پەرلەمانتارە داوا لە وەزیری دارایی عێراق دەکات رێکاری پێویست بگرێتەبەر بۆ دروستکردنی هەماهەنگی لەگەڵ وەزارەتی دارایی هەرێمی کوردستان.
ئامانج لەم هەماهەنگییە، وەک لە نووسراوەکەدا هاتووە، رەوانەکردنی لیستی نوێکراوە و داتای پەیوەست بە پلە و شایستەکانی پلەبەرزکردنەوەیە بۆ بەغدا، تاوەکو دوای پەسەندکردن و وردبینیکردنیان، شایستە داراییەکانی پلەبەرزکردنەوە بە شێوەیەکی فەرمی و ئیلزامی بخرێتە نێو پرۆژەیاسای بودجەی گشتیی فیدراڵی بۆ ساڵی 2026.