سەمرا چاغلار گۆکاڵپ، پەرلەمانتاری پارتی یەکسانی و دیموکراسیی گەلان "دەم پارتی" لە بازنەی بەدلیس، دوای36 ساڵ لە کۆچکردنی، سەردانی گوندەکەی خۆی کردەوە و ڕایگەیاند، "کاتی ئەوە هاتووە هەمووان بگەڕێنەوە سەر خاکی باوباپیرانیان".
گۆکاڵپ لە هەژماری فەرمیی خۆی لە تۆرە کۆمەڵایەتی ئێکس، وێنەیەکی خۆی و کوڕە تەمەن دوو ساڵەکەی لەسەر خانوە ڕووخاوەکانی گوندی "لێرد" لە دامێنی چیای سێسەر بڵاوکردەوە و نووسیویەتی: "کاتێک ئەم گوندە بە زۆرەملێ چۆڵکرا، من تەمەنم تەنیا دوو ساڵ بوو؛ ئێستا کوڕەکەم لە هەمان تەمەندایە و پێکەوە لەسەر خاکی باوباپیرمان وەستاوین."
ئەو پەرلەمانتارەی بەدلیس ئاماژەی بەوە کردووە کە گوندەکەیان 36ساڵ بەرلە ئێستا "بەبێ پرسیار" چۆڵکراوە و خەڵکەکەی ئاوارە کراون.
گۆکاڵپ بە هەستێکی تێکەڵاو لە ئازار و شکۆوە باس لە گەڕانەوەی دەکات و دەڵێت: "ئێستا کاتی گەڕانەوەیە بۆ سەر خاکی پیرۆز، گەڕانەوەیەکی شەرەفمەندانە."
ئەم پەیامەی پەرلەمانتارەکە لە تۆڕە کۆمەڵایەتییەکان کاردانەوەی زۆری لێکەوتەوە و وەک هێمایەک بۆ پرسی گەڕانەوەی ئاوارەکانی باکوری کوردستان بۆ سەر زێدی خۆیان دەبینرێت.