فەرمانگەی میدیا و زانیاریی حکومەتی هەرێمی کوردستان ئامارێکی نوێی دەربارەی گەشەکردنی کەرتی کشتوکاڵ و پیشەسازیی خۆراک بڵاوکردەوە؛ بەپێی ئامارەکان، ڕێژەی وەبەرهێنانی کشتوکاڵی لە نێوان ساڵانی 2018 بۆ 2026 بازدانێکی گەورەی بەخۆیەوە بینیوە.
بەپێی ئەو داتایانەی بڵاوکراونەتەوە، ڕێژەی وەبەرهێنانی کشتوکاڵی لە ساڵی 2018دا تەنیا 1.8% بووە، بەڵام لە ساڵی 2026دا ئەم ڕێژەیە بە شێوەیەکی بەرچاو بەرزبووەتەوە بۆ 12%، ئەمەش وەک هەنگاوێک بۆ بنیادنانی ئاسایشی خۆراک و پەرەپێدانی پیشەسازیی ناوخۆیی تەماشا دەکرێت.
ئامارەکانی فەرمانگەی میدیا و زانیاری بۆ ژێرخانی کشتوکاڵی و پیشەسازیی خۆراک بەم شێوەیەیە:
خانووی پلاستیکی: 30,000 خانووی پلاستیکی بۆ بەرهەمهێنانی کشتوکاڵی دروستکراون.
کۆمپانیاکان: 13,943 کۆمپانیا لەم کەرتەدا کار دەکەن.
کارگەکان: 1,341 کارگەی جۆراوجۆری پیشەسازیی خۆراک بنیادنراون.
کۆگای ساردکەرەوە: 319 کۆگای ساردکەرەوە بۆ پاراستنی بەرهەمەکان دابینکراون.