ئەمڕۆ دووشەممە، 6ـی نیسانی 2026 لە شارەکانی "قامشلۆ، چلئاغا، حەسەکە و دێرک" ناوەندەکانی تۆمارکردنی داواکاریی بۆ وەرگرتنی ڕەگەزنامەی سوریا بۆ ئەو کوردانەی کە لە سەردەمی ڕژێمی پێشوو لە مافی ڕەگەزنامە بێبەش کرابوون، كرایه‌وه و بڕیاره پرۆسه‌كه تاوه‌كو 6ـی ئایار به‌رده‌وامبێت.
بڕیاره له قۆناغی یه‌كه‌مدا وه‌‌زاره‌تی ناوخۆ داواكارییه‌كان وه‌ربگرێت و پێداچونه‌وه‌یان بۆ بكات، بۆ ئەوەی ڕێکارەکانی پێدانی ڕەگەزنامە تەواو بکرێت.
جەلال ئەحمەد، سەرۆکی ناوەندی نوسینگەی چلئاغا، بە ئاژانسی میزۆپۆتامیای ڕاگەیاندووە، ناوەندەکان بۆ ماوەی مانگێک و هەموو ڕۆژێک لە کاتژمێر 9:00ـی بەیانی تا 3:00ـی پاشنیوەڕۆ داواکارییەکان وەردەگرێت.
پارێزەر "عومەر دامان" ئەندامی تیمی یاسایی مانگی سوری عەرەبی، ئاماژەی بەوە کردووە، داواکارییەکان دوو جۆرن، داواکاریی تاکەکەسی بۆ ئەوانەی هێشتا ڕەگەزنامەیان نییە و داواکاریی خێزانی بۆ ئه‌و خێزانانه‌ی تائێستا تۆمار نه‌كراون، چ له ناوه‌وه‌ی سوریا، یاخود له ده‌ره‌وه بن.
وەزارەتی ناوخۆی سوریا، لە سەرەتای مانگی نیساندا ڕاگەیەندراوێکی بڵاوکردەوە و ڕایگەیاند، دەستیان بە وەرگرتنی داواکارییەکانی وه‌رگرتنی ڕه‌گه‌زنامه‌ی سوریا کردووە.