قەدەغەکردنی خوێندنی کچان دوای قۆناغی سەرەتایی لە قوتابخانەکانی ئەفغانستان بۆ ماوەیەکی هەمیشەیی بەردەوامە لە وروژاندنی کاردانەوە نێودەوڵەتییەکان.
ئیشەک، کە پلاتفۆرمی ژنان بۆ یەکسانییە لە تورکیا ڕایگەیاند: سیاسەتەکانی ڕژێمی تالیبان بەرامبەر بە ژنان گۆڕاوە بۆ ڕژێمێکی سیستماتیکی سەرکوتکەر، داوای کۆتاییهێنان بە هەوڵەکانی ئاساییکردنەوەی ئەم بارودۆخە لەلایەن ڕژێمی تالیبان دەکەین.
پلاتفۆرمی ئیشەک ڕایگەیاند: دوای ئەوەی لە مانگی ئابی ٢٠٢١وە تالیبان هاتە سەر حوکم، بەشێوەیەکی کاریگەر کۆتایی بە خوێندنی کچان لە دوای قۆناغی سەرەتایی لە قوتابخانەکاندا هێنراوە.
باسی لەوەش کردووەە: لەسەرەتادا ئەمە وەک شتێکی کاتی ڕاگەیەندرا. ڕژێمی تالیبان بانگەشەی ئەوەی کرد خوێندن دەستپێدەکاتەوە دوای ئەوەی بەپێی مەرجەکانی یاسای ئیسلامی و کلتوری ئەفغانستان هەموارکرایەوە، بەڵام ئەم مەرجانە هەرگیز هەموار نەکرانەوە و ڕژێمی تالیبان لە دواهەمین ڕاگەیەندراوی فەرمیدا دەڵێت: بەشێوەیەکی هەمیشەیی خوێندنی دوای قۆناغی سەرەتایی بۆ کچان قەدەغەکراوە.
بەپێی داتاکانی یونسکۆ، لەوەتەی تاڵیبان هاتووەتە سەر حوکم، نزیکەی ٢ ملیۆن و ٢٠٠هەزار کچ بێبەشکراون لە مافی خوێندنی قۆناغی ناوەندنی و باڵا لە قوتابخانەکاندا.
ئیشەک ڕایگەیاند: هەموو ئەوانەی دان بە ڕژێمی تالیبان بە شێوەی ڕاستەخۆ یاخود ناڕاستەخۆ دادەنێن پێویستە واز لەم هەڵوێستەیان بهێنن، هەموو ئەو سازشانەی لەسەر ناوی یەکسانی و عەلمانییەت ئەنجامدەدرێن لە سەرەتادا زیان بە ژنان دەگەیەنن و دواتر بە هەموو کۆمەڵگا.