کۆمپانیای سۆمۆ ئاشکرای کرد، لە کۆی هەناردەی نەوتی مانگی ڕابردووی عێراق لە ڕێگەی بەندەری جەیهانەوە، نزیکەی سێ ملیۆن بەرمیلی تایبەت بووە بە کەرکوک و هەرێمی کوردستان.
وەزارەتی نەوتی عێراق بڕی نەوتی هەناردەکراوی مانگی ڕابردووی بڵاوکردەوە و ڕایگەیاند، لەو ماوەیەدا بڕى 18 ملیۆن و 604 هەزار و 951 بەرمیل نەوتی خاو لەڕێگەی کۆمپانیای بەبازاڕکردنی نەوتی عێراق-سۆمۆوە هەناردە کراوە، کە داهاتەکەی یەک ملیار و 957 ملیۆن و 212 دۆلار بووە.
بەگوێرەی ئامارەکانی کۆمپانیای سۆمۆ، لە کۆی نەوتی هەناردەکراوی مانگی ڕابردوو، ملیۆنێک و 271 هەزار و 200 بەرمیلی تایبەت بە هەرێمی کوردستان بووە. هەروەها ئاشکرایکردووە، دوو ملیۆن و 772 هەزار و 217 بەرمیلیش تایبەت بە کەرکوک بووە کە لە ڕێگەی بەندەری جەیهانی تورکیاوە هەناردەکراوە.
سۆمۆ ئاماژەی بەوەکردوە، زۆرترین بڕی نەوتی هەناردەکراو هی ناوچەکانی ناوەڕاست و باشوری عێراق بووە کە 14 ملیۆن و 561 هەزار و 534 بەرمیل نەوت بووە.