وەزارەتی دەرەوەی سووریا ڕۆژی سێشەممە (25ـی ئابی 2026) سەردانی ئیسرائیل کاتز، وەزیری بەرگریی ئیسرائیلی بۆ شاخی هێرمۆن (جەبەل ئەلشێخ) لە پارێزگای قوونەیتەرە بە "نایاسایی" و پێشێلکارییەکی ئاشکرای سەروەریی خاکی وڵاتەکەی ناو برد و داوای لە کۆمەڵگەی نێودەوڵەتی کرد هەڵوێستی هەبێت.
لە ڕاگەیەندراوەکەی وەزارەتدا هاتووە کە ئەم کردەوە دوژمنکارییانە پێشێلکارییەکی ڕوونی یاسای نێودەوڵەتی، پەیڕەوی نەتەوە یەکگرتووەکان و ڕێککەوتنی جیاکردنەوەی هێزەکانی ساڵی 1974ـەن، و سووریا داوا دەکات هێزەکانی ئیسرائیل دەستبەجێ و بە تەواوی لەو ناوچانە بکشێنەوە کە تێیدا پێشڕەوییان کردووە.
لای خۆیەوە، ئیسرائیل کاتز لە کاتی سەردانەکەیدا بۆ ناوچە داگیرکراوەکان هۆشداری دایە سەرۆکی سووریا و ڕایگەیاند کە هێزەکانیان لە ناوچەکە دەمێننەوە.