کۆمەڵێک لە خێزانە کۆچبەرەکانی گوندی (ئوم شەئیفا)ی سەر بە شاری سەرێ کانیی ڕۆژاڤای كوردستان، دوای حەوت ساڵ ئاوارەیی، لە جەژنی ڕەمەزاندا سەردانی زێدی خۆیان کردەوە. ئەو خێزانانە لە ڕێگەی وێنە و ڤیدیۆوە، تاڵانی و وێرانکارییەکانی گوندەکەیان تۆمار کردووە، کە تێیدا تەنها گوندێکی وێرانە و چۆڵ دەبیندرێت.
بەگوێرەی ئەو دیمەنانەی کۆچبەرە گەڕاوەکان تۆماریان کردووە، گوندی (ئوم شەئیفا)، کە دەکەوێتە باکووری شارۆچکەی تەل تەمر و لەسەر ڕێگای زڕگانە، بە تەواوی وێران کراوە.
خاوەن ماڵەکان بە دڵێکی پڕەوە باس لەوە دەکەن، هەموو کون و قوژبنێکی ماڵەکانیان کە بەشێکە لە یادگارییان، ئێستا خاپورکراوە.
کۆچبەرە گەڕاوەکان ڕایانگەیاندووە، بەهۆی وێرانبوونی تەواوەتیی خانوەکانیان، لە ئێستادا هیچ ئاسۆیەک بۆ گەڕانەوە و نیشتەجێبوونیان نەماوە. جێی ئاماژەیە ئەو گوندانەی لەژێر دەستی سوپای تورکیا و گروپە چەکدارە بەکرێگراوەکاندان، دووچاری هەمان چارەنووس بوونەتەوە.
ئەم وێرانکارییە، بەهۆی هێرشەکانی ساڵی 2019ی دەوڵەتی تورکیا و گروپە چەکدارەکانی سەر بەو وڵاتە هات بۆ سەر شارەکانی سەرێ کانی و گرێ سپی، کە لە ئەنجامی ئەو هێرشانەدا، زیاتر لە 150 هەزار خێزان ئاواره بوون.
کۆچبەرانی سەرێ کانی و گرێ سپی، چاویان لەوەیە ڕێککەوتنی 29ی کانوونی دووەمی نێوان هه‌سه‌ده و حكومه‌تی كاتی دیمه‌شق بچێتە بواری جێبەجێکردنەوە، بە ئامانجی ئەوەی بە شێوەیەکی بە کۆمەڵ و پێکەوە بگەڕێنەوە سەر ماڵەکانیان و کۆتایی بە ژیانی کۆچبەری بهێنن.