ماڵپەڕی ئەکسیۆس بڵاویکردەوە، واشنتۆن و تاران لە ڕێککەوتنی کۆتایی نزیکبوونەتەوە بە جۆرێک ڕێککەوتنەکە هەڵگرتنی سزاکان و کردنەوەی گەرووی هورمز لەخۆدەگرێت.
ماڵپەڕی ئەکسیۆسی ئەمریکی ئاماژەى بەوەشکردووە، واشنتۆن و تاران زۆر نزیک بوونەتەوە لە واژۆکردنی یاداشتنامەیەکی یەک لاپەڕەیی بۆ کۆتاییهێنان بە جەنگ و ئاڵۆزییەکان.
ئاماژە بەوەشکراوە، بەرپرسانی ئەمریکا چاوەڕوانن لە ماوەی کەمتر لە دوو ڕۆژدا، ئێران وەڵامی چەند خاڵێکی سەرەکی داواکانیان بداتەوە تا ڕێککەوتنەکە بچێتە بواری جێبەجێکردنەوە.
ئەوەشخراوەتەڕوو، بەپێی ڕێککەوتنەکە، هەردوو وڵات ئەو کۆت و بەندانە هەڵدەگرن کە خستوویانەتە سەر هاتوچۆی کەشتییەکان لە گەرووی هورمز و ئێران پابەند دەبێت بە ڕاگرتنی پڕۆسەی پیتاندنی یۆرانیۆم، کە یەکێک بوو لە کێشە هەرە ئاڵۆزەکانی نێوان هەردوولا.
گوتوشیانە، لە بەرامبەردا، واشنتۆن سەرجەم سزاکانی سەر ئێران هەڵدەگرێت و پارە بلۆککراوەکانی ئەو وڵاتە لە بانکە جیهانییەکاندا ئازاد دەکات.