ئاژانسی هەرانا بڵاویكرده‌وه، چوار ژنە چالاکوانی ئێرانی لەلایەن هێزە ئەمنییەکانی ئێرانەوە بەبێ ئاگاداركردنه‌وه‌ی پێشوەختە دەستگیراون و بەرەو شوێنێکی نادیار گواستراونەتەوە.
بەگوێرەی ئاژانسەکە، لە 2ی نیسانی ئەمساڵدا نەسرین ستوودە، ژنە چالاکوانی بواری مافەکانی مرۆڤ و پارێزەر بەبێ بوونی ئاگاداری پێشوەختە لەلایەن هێزە ئەمنییەکانی ڕژێمی ئێرانەوە بەشێوەیەکی توندوتیژانە دەستگیرکراوە و سەرجەم کەلوپەلە ئەلکترۆنییەکانیشی دەستیان بەسەردا گیراوە.
ئاماژە بەوەشکراوە، هەریەک لە مینوو ئەندەخاس كه هاوڵاتیی بەهاییه لە شاری ساری و مەهسا ستوودەی تەمەن 25 ساڵەی دانیشتووی شاری شیراز، ماندانا ستوودە و هاوژینەکەی بەناوی بێهزاد بەسیری لەلایەن دەزگای ئیتڵاعات و هێزە ئەمنییەکانی ئێران دەستبەسەرکراون و بەرەو شوێنێکی نادیار ڕاگوازراونەتەوە.
ئاژانسەکە ئاماژەی بەوەکردووە، تا ئێستا هیچ زانیارییەک سەبارەت بە چارەنووسی ئەم چوار ژنە چالاکوانە نازانرێت و شەپۆلی دەستگیرکردن و ڕفاندنی چالاکوانان ڕۆژ لە دوای ڕۆژ ڕوو لە هەڵکشان دەکات.