Hevserokê giştî yê DEM Partiyê Tuncer Bakirhan û şandeya ku ji berdevka DEM Partiyê Ayşegul Dogan, serokwekîlê Koma DEM Partiyê Sezaî Temellî û cîgirê hevserokên giştî yê ji rêveberiyên herêmî berpirsyar Mehmet Rustu Tîryakî pêk dihatin, ji ber biryara ‘Betalkirina Teqez’ li meclisê serdana koma CHP'ê kirin.
Tuncer Bakirhan û şandeya pê re li koma CHP'ê bi serokê giştî yê CHP’ê Ozgur Ozel re ku ji peywirê hatibû dûrxistin, hevdîtin kirin.
Di hevdîtinê de serokwekîlê koma CHP'ê Murat Emîr û cîgirê serokê giştî yê CHP'ê Sezgîn Tanrikulu cih girtin.
Piştî hevdîtinê şandeya DEM Partî û CHP'ê daxuyanî dan.
Destpêkê Ozgur Ozel axivî û anî ziman ku meclis niha ji navenda giştî ya CHP'ê re malovaniyê dike û wiha got:
“Em li vir kar û xebatên xwe jî didomînin. Me îro serdaneke pir binirx jî qebûl kir.
DEM Partî ku piştî CHP'ê li meclisê partiya herî zêde xwedî kursî ye, serdana me kir. Em spasiya wan dikin.”
Bakirhan: Xilasiya ji vê rewşê jî ew e ku rejîm demokrat bibe
Hevserokê giştî yê DEM Partiyê Tuncer Bakirhan piştî hevdîtina bi serokê giştî Ozgur Ozel re, diyar kir ku ew destwerdana bi destê darazê rewa nabînin.
Tuncer Bakirhan hevdîtina bi CHPê re weke gaveke erênî girt dest û got:
"Bi biryara betalkirina teqez siyaseta Tirkiyê careke din di krîzê de ye.
Dîmenên duh ên ku bi darê zorê polîs ketin hundirê navenda giştî ya CHP'ê, şermeke mezin bûn.
Divê em xwedî li demokrasiyê derkevin. Sedema vê rewşê kêmbûna demokrasiyê ye.
Xilasiya ji vê rewşe jî ew e ku rêjîm demokrat bibe û hiqûq pêk were. Li cîhanê geşedanên girîng diqewimin.
Divê Tirkiye di vê pêvajoyê de enerjiya xwe ji bo krîzên siyasetê xerc neke û aştiya civakî mayînde bike."
Tuncer Bakirhan di axaftina xwe de bal kişand li ser destwerdanên ku li ser siyasetê tên kirin û axaftina xwe wiha bi dawî kir:
"Em hêvî dikin CHP di vê pêvajoyê de hevpariya xwe biparêze û bi awayekî serkeftî di nav xwe de çareser bikin.
Partiyek divê ne bi destê darazê, bi destê xwe û vîna xwe diyar bike. Em ti destwerdaneke derve rewa nabînin.
Em di wê baweriyê de ne ku CHP dikare vê pêvajoyê bi kongreyeke demokratîk derbas bike. Em careke din selametiyê dixwazin."
