Rêveberiya Tevgerê têkildarî qanûna çarçoveyê daxuyanî da û bal kişand ser rola Rêberê Damezirîner ê PKK'ê Abdullah Ocalan:
"Rêber Apo piştî daxuyaniya Devlet Bahçelî gotibû hêza min heye ku rewşa şer a ji ber pirsgirêka Kurd bikişîne ser zemîna hiqûqî û siyasî.
Bi Banga Aştî û Civaka Demokratîk a 27'ê sibata 2025'an re nexşerêya vê yekê bi şênberî anî holê.
Tevgera me ya Azadiyê li ser bingeha banga Rêber Apo ji bo pêşveçûna pêvajoya aştî û civaka demokratîk berpirsyariya xwe bi cih anî."
"Di nava vê qanûnê de şaştî û kêmasiyên cidî hene"
Rêveberiya Tevgerê der barê Qanunê de ziman û têgihên ku hatine bikaranîn rexne kirin, weke kêmasiyên cidî pênase kirin û got:
"Di nava vê qanûnê de şaştî û kêmasiyên cidî hene.
Pêşniyarên ku di rapora komîsyona meclisê de ji bo çareseriya pirsgirêka Kurd û demokratîkbûnê hatin kirin, di vê raporê de cih negirtine.
Bêyî bikaranîna têgiha Kurd vegotina bêçekbûnê nîşan dide ku pirsgirêk bi rengekî hevgirtî nehatiye nirxandin."
"Rola Abdullah Ocalan di qanûnê de nehatiye diyarkirin"
Rêveberiya Tevgerê ji bo gavavêtinê şertên xwe yên teqez dîsa tîne ziman û wiha didomîne:
"Lê belê rola ku Rêber Apo di vê pêvajoyê de pê rabe, di qanûna çarçoveyê de nehatiye diyarkirin.
Tenê bi rengekî nediyar hatiye gotin, desteya di bin serokatiya alîkarê serokkomar de bê avakirin wê karibe desteyan ava bike.
Eger Rêber Apo nikaribe di nava mercên azad ên jiyan û karkirinê de koordînatoriyê ji vê desteyê re bike, gelek xusûsên ku qanûn diyar dike wê pêk neyê."
Selçuk Mizrakli û Selahattin Demirtaş bi nameyekê piştgirî dan qanûnê
Ji aliyekî din ve, Selçuk Mizrakli û Selahattin Demirtaş ku di girtîgehê de ne, bi nameyekê nêrînên xwe yên der barê qanûna çarçoveyê ji raya giştî re parve kirin.
Herdu girtî di nameya xwe de nêrînên xwe wiha tînin ziman:
"Em dixwazin were zanîn ku em bi hemû dil, dilsozî û ciddiyeta xwe di vê pêvajoyê de ne, tenê ji bo xurtkirin û berfirehkirina aştî, refah û biratiya 86 milyon kesan û me bi hemû hêza xwe piştgirî da vê pêvajoyê.
Ev pêvajo ne pêvajoyeke dabeşkirin, veqetandinê ye, an jî pêvajoyeke dayîn û girtinê ye ku li ser bingeha danûstandinên erzan e."
Demîrtaş û Mizrakli: Em hêvî dikin ev gav dê deriyên nû veke
Demîrtaş û Mizrakli di nameya xwe de hêviyên xwe yên der barê pêvajoyê de wiha anîne ziman:
"Em bawer dikin ku ev gav, ku em hêvî dikin ku ji bo me hemûyan sûdmend be, dê deriyên nû di siyasetê de jî veke, bi nezaket, hevkariyê û gihîştinê bîne.
Di dawî de Demîrtaş û Mizrakli Abdullah Ocalan, Erdogan, Bahçelî di serî de spasya aliyên ku di pêşketina vê pêvajoyê de rol lîstine kirin.
