Di ser têkçûna DAIŞ`ê re 6 sal derbas bûn, lê dîsa mijara xeterî û ji nû ve zindîbûna DAIŞ`ê ketiye rojeva navneteweyî.
Pisporê karûbarên rêxistinên tundrew ê Misrî Munîr Edîb destnîşan kir ku tunebûna stratejiyeke navneteweyî dê bibe sedema vegera DAIŞ`ê.
Munîr Edîb anî ziman ku civaka navneteweyî hîn jî di têkoşîna li dijî DAIŞ`ê de zehmetiyan dikşîne.
"Koalîsyona Navneteweyî di vî warî de du caran têk çûye"
Edîb da zanîn ku Koalîsyona Navneteweyî di vî warî de du caran têk çûye û wiha got:
“Cara yekem piştî ragihandina 'xîlafetê' di sala 2014`an de bû, têkoşîna li dijî DAIŞ`ê 5 sal dom kir heta ku rêxistin ji Reqa û Mûsilê derxist.
Cara duyemîn jî di sala 2019`an de dema hilweşîna DAIŞ`ê ragihandibû.”
"Têkiliyek dostaniyê di navbera DAIŞ`ê û HTŞ`ê de heye"
Her wiha Pisporê Misrî eşkere kir ku desthilata nû ya li Sûriyeyê bi awayekî nerasterast ji bo tundrewiyê jîngeheke guncaw peyda kiriye û got: "Têkiliyek dostaniyê di navbera DAIŞ`ê, Heyet Tehrîr El Şam û komên din ên tundrew ên Îslamî yên li Sûriyê de heye."
Munîr Edîb: Banga avakirina dezgeheke navneteweyî kir
Pisporê karûbarên rêxistinên tundrew ê Misrî Munîr Edîb di dawiya de banga avakirina dezgeheke navneteweyî di bin sîwana Neteweyên Yekbûyî de kir ku erka wê tenê mijûlbûna bi rêxistinên terorîst re be.
Vladimir Voronkov: DAIŞ bi hatina HTŞ`ê re zindî bû
Her wiha serokê Ofîsa Dijî Terorê ya Neteweyên Yekbûyî Vladimir Voronkov jî diyar kir ku hîn jî DAIŞ`ê li Sûriyê gefeke rastîn e û wiha axivî :
Piştî hatina Heyet Tehrîr El Şam (HTŞ) ser desthilatê, DAIŞ vê valahiya ewlehiyê bikar tîne da ku êrişan pêk bîne û nakokiyên mezhebî gur bike.