Li Sêweregê li jinê destdirêjî.. yek ji wan cerdevan sê kes hatin girtin

Li gundekî navçeya Sêweregê ya Rihayê, di 16ê Hezîranê de ji aliyê Şehmus S., Arif S., Halil S., Mehmet S. û zarokekî ve jinek hatiye revandin.

Hat hînbûn ku malbata jinê bi jendermeyan re têkilî daniye û navên kesên ku ew revandine, dane wan.

Hat îdiakirin ku cendermeyan bi Şahin S. re têkilî danîne, ku bi xizmekî yek ji revandaran re zewicî ye û di heman demê de cerdevan e û jê xwestine ku jinê vegerîne.

Jina ku rojek şûnda bi saya hewldanên malbatê hate dîtin, derket holê ku rastî tecawizê hatiye.

Cendermeyan, Şahin S., Fatma S., û Halil S. binçav kirin.

Piştî bûyerê, jin çû Dozgeriya Komarê ya Sêweregê û gilî kir.

Li dijî 11 kesên ku tevlî bûyerê bûne lêpirsîn hate destpêkirin.

Di çarçoveya vê lêpirsînê de, ji bo Şehmus S., Arif S., û Mehmet S. biryara binçavkirinê hate derxistin.

Her wiha Şahin S., Fatma S., û Halil S. hatin girtin û şandin girtîgehê.

Delîlên destdirêjiyê hatin dîtin

Ji aliyekî din ve, hate gotin ku di muayeneya jina ku birine nexweşxaneyê de encamên ku nîşan didin tecawiz li wê hatiye kirin derketine holê.

Li dijî zarokê der barê sûcê tecawizê de doz hatine vekirin.

Bavê jinê, li ser bûyerê axivî û got: "Roja bûyerê, ez ji bo kar çûm Wêranşarê.

Jin û zarokên min li malê bûn.

Şehmus S., Arif S., Halil S., Mehmet S. û zarokekî, hemû ji heman gundî, keça min bi girêdana dev, dest, mil û lingên wê revandin.

Ew birin cihekî din. Gava ku min bûyer bihîst, ez çûm û min ew ji cendermeyan re ragihand.

Cendermeyan bi Şahin S., xizmekî kesên ku keça min revandine re têkilî danî û jê xwest ku keça min vegerîne.

Lê belê, cendermeyan bi xwe neçûn û wan nedîtin; wan hewleke wisa neda."

Kesên ku destdirêjî kirine gefê li malbatê dixwin

Bav, diyar kir ku piştî bûyerê ew neçar mane ku gund biterikînin û ev anî ziman:

"Ez neçar mam ku mal û rezê xwe biterikînim. Niha ez û keça xwe li cem xizmekî xwe dimînin.

Ez neçar mam ku endamên din ên malbata xwe bişînim bajarekî din.

Şehmus S. bi rêya kesên din gefê li min dixwe.

Dixwazin ku ez giliya xwe vekişînim. Dixwazin vê rewşê veşêrin."