Li bajarê Freiburg ê Almanyayê çalakiyeke nû ya çandî destpê kir. 1'emîn Festîvala Film a Kurdî bi hewldana hevpar a pêkhateyên sînemaya Kurdî û li ser navê Komeleya Çandê ya Avesta deriyê xwe li pêşberî hezkiriyên sînemayê vekir.
Vekirina festîvalê li sînemaya Komunal Kino bi axaftina endamên Komîteya Amadekar a Komuna Film a Freiburg, Newroz Sonmez û Mustafa Ozel pêk hat. Piştî axaftinan hunermend Hozan Axîn derket ser dikê.
Di roja yekem a vê çalakiyê de, filmê drama yê bêdeng ê bi navê “Zare” ku di sala 1926'an de ji aliyê Hamo Behnazaryan ve hatiye çêkirin, bi performanseke muzîkal a zindî hate pêşandan.
Her wiha kurtefilmekî derhênerekî Kurd ê ji Kerkûkê ku çîroka sê ciwanên li kampa koçberan a li bakurê Norweçê vedibêje, hate temaşekirin.
Festîval wê di navbera 2-4'ê Cotmehê de berdewam bike. Di nav bernameyê de cîh ji 4 filmên metraja dirêj, 4 belgefilm û 8 kurtefilman re (bi giştî 16 film) hatiye veqetandin. Di roja duyem de, bi boneya salvegera Komkujiya Vartînîsê, belgefilma "Vartînîs" a derhêner Mehmet Omer Bîçer wê were nîşandan.
Ji bilî vê, fîlmên wekî Hevras, Hemo Morî, Mein Vater, der Gastarbeiter û Hevî jî di nav bernameya festîvalê de ne ku armanc dikin xebatên sînemagerên Kurd ên ji herêmên cuda bigihînin ber çavên temaşevanan.
