Li gorî daxuyaniya Serokê Çavdêriya Mafên Mirovan a Tûnisê, keştiya navborî roja Pêncşemê sibehê bi rê ketibû. Yek ji kesên ku ji karesatê rizgar bûye diyar kir ku wan piştî binavbûna keştiyê bi saetan di nava deryayê de ji bo jiyana xwe têkoşîn dane. Hate ragihandin ku rewşa tenduristiyê ya yek ji rizgarbûyan giran e.
Ev bûyer careke din peymana koçberiyê ya di navbera Yekîtiya Ewropayê û Tûnisê de anî rojevê. Rêxistinên navneteweyî yên mîna Human Rights Watch û Amnesty International beriya niha bi daxuyaniyeke hevpar hişyarî dabûn ku ev peyman dibe sedema zêdebûna binpêkirinên giran ên li dijî mafên koçber û penaberan. Van rêxistinan bang kiribûn ku fînansekirina hêzên ewlehiyê yên Tûnisê yên ji bo kontrolkirina sînoran were rawestandin.
Tevî ku rayedarên Tûnisê bi fînanse û alavên teknîkî yên Yekîtiya Ewropayê kontrolên li ser sînorên deryayî tundtir kirine û di du salên borî de hejmara derketinan kêm bûye jî, Tûnis hîn wekî yek ji xalên herî sereke ya destpêkê ya koçberên ber bi Ewropayê ve girîngiya xwe diparêze.
