Aloziya li ser statuya Girên Golanê di navbera Tel Avîv û Şamê de gihîşt asteke nû. Wezîrê Parastinê yê Îsraîlê Israel Katz, li ser hesabê xwe yê torên civakî vîdyoyeke Serokkomarê Sûriyeyê Ehmed Şera parve kir û peyameke zelal da rêveberiya nû ya Şamê. Katz destnîşan kir ku statuya Golanê nayê nîqaşkirin û ev herêm dê bi her awayî di bin kontrola Îsraîlê de bimîne.
Katz di peyama xwe de hişyariyeke tund da Şamê û got: "Golan dê heta hetayê di bin serweriya Îsraîlê de bimîne. Artêşa Îsraîlê dê ji herêmên ewlehiyê yên li lûtkeya Çiyayê Şêx venekişe."
Wezîrê Îsraîlî her wiha anî ziman ku heke Sûriyê hewl bide ewlehiya Îsraîlê bixe metirsiyê, her axa ku di encama bersivdanê de were kontrolkirin dê di destê Îsraîlê de bimîne.
Ev rageşî piştî daxuyanî û vîdyoyên Ehmed Şera yên derbarê "Rizgarkirina Golanê" de derket holê. Li aliyê din, aliyên navxweyî û navnîşên nûçeyan radigihînin ku Îsraîl piştî rûxandina rejîma berê ya Sûriyê, hebûna xwe ya leşkerî li ser sînor û herêmên tampon zêde kiriye da ku nehêle tu hêzên ser bi Îranê ve nêzî sînor bibin.
