Banka Cîhanî roja Çarşemê ragihand ku wê fînansmana zêdetirî 1 milyar dolar (860 milyon euro) ji bo projeyên binesaziyê û ji nû ve avakirinê li Iraq, Sûriye û Lubnanê pejirand.
Beşa herî mezin ji bo Iraqê hat veqetandin. Banka Cîhanî ragihand ku ew ê 930 milyon dolar piştgirî bide Iraqê da ku binesaziya rêhesinê ya welêt baştir bike, bazirganiya navxweyî zêde bike, kar biafirîne û aboriyê pirreng bike.
Li gorî Banka Cîhanî, Projeya Berfirehkirin û Modernîzekirina Rêhesinê ya Iraqê armanc dike ku kapasîteya barhilgiriyê bi rêya baştirkirina veguhastinê di navbera Bendera Um Qesr a ku li başûrê Kendeva Basrayê û bajarê Musil ê ku dikeve bakurê wê de zêde bikin.
Rêveberê Rojhilata Navîn ê Banka Cîhanî Jean-Christophe Carre ji bo mijarê wiha got: “Her ku Iraq ji nû ve avakirinê ber bi pêşketinê ve diçe, torên bazirganî û girêdanê yên dikarin mezinbûnê baştir teşwîq bikin, kar biafirînin û girêdayîbûna petrolê kêm bikin.”
Ji bo Sûriyeyê jî, ji bo vegerandina elektrîka erzan û pêbawer û piştgiriya vejîna aborî, alîkarîyek ji 146 mîlyon dolarî hat pejirandin. Banka Cîhanî diyar kir ku xetên veguhestinê û navendên trafoyê yên zirar dîtî dê di çarçoveya Projeya Awarte ya Elektrîkê ya Sûriyeyê de werin tamîrkirin.
Meha borî, Sûriyeyê peymanek bi konsorsiyûmek ji şîrketên Qeterî, Tirkiye û Amerîkî re îmze kir. Ev peyman ji bo projeyek enerjiyê ya 5,000 megawatî bû da ku binesaziya elektrîkê ya ji ber şer zirar dîtiye bivejîne.
Ji bo Lubnanê jî, 250 milyon dolar piştgirî ji bo tamîrkirina binesaziya giştî ya girîng û xizmetguzariyên bingehîn ên li welêt, ku ji şerê 14 mehan ê di navbera Hizbullah û Îsraîlê de xilas dibe, hat pejirandin.
Rodî Bişeng