Aloziya serbazî ya rasterast di navbera Washington û Tehranê de gihîşt asteke metirsîdar. Supaya Pasdarên Şoreşa Îslamî ya Îranê (IRGC), wek bersivdaneke tund li dijî operasyonên deryayî yên Amerîkayê, bi mûşekên balîstîk êrîşî baregeha esmanî ya Al-Azraq a li Urdunê kir. Ev der wek baregeheke stratejîk a balafirên şer û dronên Amerîkayê tê naskirin.
Sedema şer: Teqandina tankerên neftê yên îranê
Li gorî daxuyaniya Fermandariya Navendî ya Amerîkayê (CENTCOM), hêzên wan roja Sêşemê 5 tankerên neftê yên Îranê (M/T Kaviz, M/T Charminar, M/T Horizon 1, M/T Riesco û M/T Derya) li Kendava Omanê û nêzîkî Girava Xargê teqandin û rûxandin. Amerîkayê eşkere kir ku ev êrîş piştî wê yekê hat ku Îranê di du rojan de du caran bi mûşekan êrîşî keştiyên şer ên Amerîkayê kiribû. CENTCOM'ê destnîşan kir ku wan beriya lêdanê hişyarî daye xebatkarên tankerên Îranê ku keştiyan biterikînin.
Îran: Me zirarên mezin gihandin hangarên F-35
Ajansa fermî ya Îranê (IRNA) ragihand ku ev operasyona wan a mûşekî wek "pêngaveke cezakirinê" li dijî Amerîkayê hatiye kirin. Îranê îdîa kir ku mûşekên wan rasterast li hangar û parastgehên balafirên şer ên pêşketî yên mîna F-15, F-16 û F-35 ketine û zirarên pir mezin gihandine binesaziya serbazî ya Amerîkayê ya li baregeha Al-Azraqê.
Urdun û Amerîka: Piraniya mûşekan hatin rûxandin
Tevî îdîayên Îranê, rayedarên artêşa Urdunê û berpirsên Amerîkî daxuyaniyên cuda belav kirin. artêşa Urdunê bi daxuyaniyeke fermî ragihand ku pergalên wan ên parastina esmanî pir bi serkeftî kar kirine û 18 mûşekên balîstîk ên Îranê li esmanê welat rûxandine. Tenê du mûşek ketine herêmên çolistan û vala.
Pentagonê û berpirsên serbazî yên Amerîkayê ragihandin ku ev êrîş bêbandor bûye, hemû leşkerên wan saxin û ti ziyanên canî çênebûne.
Herêm niha di nav metirsiya geşbûna şerekî hîn berfirehtir de ye, ji ber ku Îranê hişyarî daye ku ew ê keştiyên neftê yên welatên hevalbendên Amerîkayê yên mîna Kuweyt û Behreynê jî bikin armanc.
