Li Tirkiyeyê krîza di sîstema hakemtiyê de gihîşt asta edlî. Li ser giliyê hakemekî berê, operasyoneke berfireh li dijî rêveberiya jorîn a Desteya Navendî ya Hakeman (MHK) hat destpêkirin. Di çarçoveya lêpirsînê de Serokê MHK'yê Ferhat Gundogdu û 6 endamên din ên desteyê (Ferdî Karadoruk, Ahmet Şahîn, Yunus Yildirim, Sebahattîn Şahîn, Alîcan Saglar û Emre Kosîf) bi îdiayên ciddî yên wekî "zexta derûnî û sextekariya belgeyan" hatin desteserkirin.
Hakemê berê yê xwedî kokarta FIFA'yê Denîz Ateş Bîtnel li ser medyaya civakî ragihand ku parêzer û rayedarên Federasyona Futbolê ya Tirkiyeyê (TFF) çûne navenda emniyetê. Wezîrê Dadê Akın Gurlek jî derbarê mijarê de daxuyaniyeke fermî da û destnîşan kir ku ji bo zelalkirina îdiayên ku pêbaweriya futbolê xera dikin, ew ê têkoşîna "futbola paqij" bidomînin û berpirs dê li pêşiya hiqûqê hesab bidin.
Ev operasyona krîtîk nîşan dide ku pirsgirêkên di sîstema futbolê de ji xeletiyên li qadê derbas bûne û gihîştine asta sûcên îdarî û edlî ku dikare bandoreke kûr û berfireh li ser pêkhateya TFFyê bike.
