Girtina Tengava Hurmizê û kêmkirina hinardekirina petrolê, pirsgirêkên mezin ji bo aboriya Îraqê çêkirine.
Berî van rûdanan û girtina tengavê, hinardekirina rojane ya petrola xav a Îraqê nêzîkî 3 milyon û 600 hezar bermîl bû.
Lê niha ev mîqdar ji bo nêzîkî milyonek û 700 hezar bermîlî daketiye.
Ev tê wê wateyê ku Îraqê bêtirî nîvê şiyana xwe ya hinardekirinê winda kiriye.
Kêmbûna hinardekirina neftê pirsgirêkên aborî ji Îraqê re afirandine
Ev windahiya mezin hişt ku Îraq vegere ser xeta boriya petrolê ya Banyasê ku bi salan bû piştguh kiribû.
Lê belê wiha xuya dike ku ev proje hem demeke dirêj û hem jî lêçûneke pir mezin dixwaze.
Ji ber vê yekê, ew nabe çareseriyeke bilez ji bo pirsgirêka hinardekirina petrola Îraqê.
Reuters: Ji bo xeta boriya Kerkûk-Banyasê jinûveavakirin pêwîst e
Li gorî raporekê ji ajansa Reutersê, ew boriya petrolê ya ku xetên petrolê yên Îraqê bi bendera Banyasê ve girêdide, herî kêm pêdiviya xwe bi çar salan ji bo avakirinê heye û 15 milyar dolar lêçûna wê dibe.
Ev dem du qasî wê demê ye ku berê ji aliyê berpirsên Îraqî û Amerîkî ve hatibû pêşbînîkirin.
Ev proje wekî destpêşxeriyek ji bo alternatîfeke stratejîk a li dijî Tengava Hurmizê hatibû dîtin.
Ew boriyên ku Kerkûkê bi bendera Banyas a Sûriyê ve girêdidin, ji ber şerên li Îraq û Sûriyê ziyanên pir mezin dîtine.
Ev xet ji salên 1980'yî û vir ve bi şêwazekî guncaw nehatine bikaranîn.
Ji ber vê yekê, nûjenkirina wan dê pir zehmet be û ev borî ligel taybetmendiyên nû yên hinardekirina petrolê nagunjin û nayên bikaranîn.
Her ku diçe giringiya vebûna Tengava Hurmuzê û rawestandina tam a şerê navbera Amerîka û Îranê zêdetir dibe.
Girtina berdewam a vê tengavê ku pênceka sotemeniya cîhanê tê re derbas dibû û yek ji şahdamarên herî girîng ên aboriya cîhanê û bi taybetî ya welatên Kendavê bû, ziyanên pir mezin ên aborî bi xwe re tîne.
