ئەمڕۆ 23ـی ئازاری 2026، ئەبو جەمال حەیدەری، گوتەبێژی سەربازیی کەتائیبی ئەولیائوڵڵا لە ڕاگەیەنراوێکدا، هۆشداریی توندیدایە حزبی تەقەدوومی محەمەد حەلبوسی و خەمیس خەنجەر و گوتی، "ڕێگری لەو پیلانگێڕیی و نەخشە شەیتانییانە دەکەین کە لە ڕێگەی کۆمپانیای وەهمییەوە لەناو عێراقدا بۆ خزمەتی ئەمریکا و ئیسرائیل ئەنجامی دەدەن.
ئاماژەی بەوەشکرد، "فایلی تەواوی" لەسەر ئەو لایەنانە لایە و "چاویان لەسەریانە و چاودێریی کۆبوونەوە ناوخۆیی و داخراوەکانتان دەکەین، چی لە هەولێر و سلێمانی بێت، یان لە دەوحە و شوێنەکانی دیکە بێت".
حەیدەری ئەو لایەنە سیاسییانە تۆمەتبار دەکات بەوەی لە ڕێگەی "تۆڕی سیخوڕی و شانەی تیرۆریستیی سەر بە بەعس و مۆساد، هەوڵی بەدیهێنانی ئامانجەکانیان دەدەن، بەڵام جەختدەکاتەوە "داگیرکەر لەژێر ئاگر و لێدانەکانی موقاوەمەدا لە عێراق ڕادەکات".
لە ڕاگەیەندراوەکەدا، هۆشداریی دەداتە سەرکردە ئەمنیی و هەواڵگرییەکانی عێراق و دەڵێت، "ئاگاداری هاوکاریکردنی داگیرکەر بن دژی موجاهیدەکان، چونکە ئارامگریمان بەرەو نەمان دەچێت و ڕەحم بە هیچ خیانەتکارێک ناکەین، ناوی هەرچییەک بێت و پلەکەی هەرچەند بێت".