سەرۆکی پەرلەمانی ئێران ڕایگەیاند کە تاوەکو ئەمریکا بە تەواوی پابەندی مەرجەکانیان نەبێت، گەرووی هورمز بەڕووی هاتوچۆی کەشتییەکاندا بە داخراوی دەمێنێتەوە و جەختیشی لەوە کردەوە کە ڕاگەیاندنی ئاگربەست نیشانەی شکست و بێهیوایی واشنتن بووە.
محەممەد باقر قالیباف، سەرۆکی پەرلەمانی ئێران، لە لێدوانێکدا ئاماژەی بەوە دا کە ئاگربەست سەلمێنەری شکستی ئەمریکا بووە، ئەوەش دەرفەتی هەڵگرتنی گەمارۆکانی ڕەخساندووە و یارمەتیدەر بووە بۆ بەرزکردنەوەی خۆڕاگریی ئابووری و بەهێزکردنی توانای بەرگریی سەربازیی وڵاتەکەی.
ناوبراو ڕوونیکردەوە کە پێش هەڵگرتنی گەمارۆ دەریایی و ئابوورییەکان، ئازادکردنی داراییە بلۆککراوەکانی ئێران و کۆتاییهێنان بە مەترسی و هێرشە سەربازییەکان لە ناوچەکەدا، گەرووی هورمز هەرچۆنێک بێت بە داخراوی دەمێنێتەوە و ڕێگەی پێ نادرێت بکرێتەوە.