گوتەبێژی پژاک ڕایگەیاند کە نابێت چارەنووسی گەلان تەنیا لە چوارچێوەی ململانێ یان ڕێککەوتنی نێوان زلهێزەکان و ڕژێمی ئێراندا ببینرێت و جەختی لە دەوری یەکلاکەرەوەی کۆمەڵگە وەک هێزی سێیەم کردەوە.
ڕێوار ئاودانان، گوتەبێژی پارتی ژیانی ئازادیی کوردستان (پژاک)، لە بارەی بارودۆخی ئێران پەیامێکی لە تۆڕی کۆمەڵایەتی ئێکس بڵاوکردەوە و ڕایگەیاند، کورتکردنەوەی هەموو شتێک بۆ دووانەی شەڕ یان سازانی نێوان زلهێزەکانی جیهان و ڕژێمی کۆماری ئیسلامی بیرکردنەوەیەکی چەوت و قەدەرگەرایانەیە.
هەروەها ئاماژەی بەوەشکردووە، ئەکتەری سیاسی و هێزی سێیەم هەن و کۆمەڵگە و ڕێکخستنە شۆڕشگێڕییە پێشەنگەکانی کۆمەڵگە بە هزری سەربەخۆ و ئیرادەی ئازادی خۆیان، دەتوانن لە ساتێکی یەکلاکەرەوەدا بێنە گۆڕەپانەکەوە و سەراپای دیمەنەکە بگۆڕن.