ئەمڕۆ یەکشەممە، 14ـی حوزەیرانی2026، شۆڕش ئیسماعیل، وەزیری پێشمەرگەی حکومەتی هەرێمی کوردستان، پێشوازی لە عەمید دەنکان مان، جێگری فەرماندەی هێزەکانی ئۆپراسیۆنی هاوبەش کرد.
لە دیدارەکەدا دوایین پەرەسەندنە ئەمنی و سەربازییەکانی هەرێمی کوردستان، عێراق و ناوچەکە و پەرەپێدانی پەیوەندییەکانی نێوان هەردوولا تاوتوێ کران.
لە کۆبوونەوەکەدا، کە فەریق ڕوکن بەختیار محەممەد سدیق، ئەمینداری گشتیی وەزارەت و ژمارەیەک لە ئەفسەرانی پلەباڵا ئامادەی بوون،
هەردوولا جەختیان لە گرنگیی بەهێزکردنی هەماهەنگی و کارکردنی پێکەوەیی نێوان هێزەکانی پێشمەرگە و هێزەکانی هاوپەیمانان کردەوە، لە پێناو پاراستنی ئاسایش و سەقامگیریی ناوچەکەدا.
لە بەشێکی دیکەی دیدارەکەدا، پرۆسەی هاوکاری و پاڵپشتییە سەربازییەکان بۆ وەزارەتی پێشمەرگە خرایە بەرباس.
لەمبارەیەوە وەزیری پێشمەرگە جەختی لە گرنگی و بەردەوامیی پاڵپشتییەکانی هاوپەیمانان لە سەرجەم بوارە جیاوازەکاندا بۆ هێزی پێشمەرگە کردەوە.
لای خۆشیەوە، عەمید دەنکان مان، پشتیوانیی هێزەکانی ئۆپراسیۆنی هاوبەشی بۆ هێزەکانی پێشمەرگە دووپاتکردەوە، بە ئامانجی چەسپاندنی زیاتری ئاشتی و ئارامی لە ناوچەکەدا.