بەڕێوەبەری ناوەندی ڕاگەیاندنی هێزەكانی سوریای دیموكرات (هەسەدە) ڕایگەیاند، تائێستا بڕیاری فەرمیی بۆ دانانی نورەدین ئەحمەد وەكو پارێزگاری حەسەكە دەرنەچووە.
فەرهاد شامی، بە كەناڵی روناهی گوتووە، بڕگە كارگێڕی و ئەمنییەكانی ڕێككەوتنی نێوان حكومەتی دیمەشق و هەسەدە جێبەجێكراون، ئێستا چووینەتە ناو جێبەجێكردنی بڕگە سەربازییەكان كه هێزەكانی هەسەدە و حكومەت دەگرێتەوە.
دەشڵێ، هێزەكانمان دەگەڕێنەوە بۆ پێگە سەرەكییەكانیان بەر لە شەڕ و هێزەکانی ئاسایشی ناوخۆ لەو شوێنانە بڵاوبوونەتەوە کە هێزەکانمان کشاونەتەوە.
ئاماژە بەوەشدەکات، لەلایەنی حكومەتەوە كاتكوشتن هەیە لە جێبەجێكردنی بڕگەكانی رێككەوتنەكە و هەندێك بەربەستیش هەن، یەكێك لە بەربەستەكان بڕگەی تایبەت بە شەڕڤانە دیلەكانمانە كە دەبوو ئازاد بكرێن و ئازاد نەکراون.
دەشڵێ، تائێستا لە كۆبانێ هیچ جۆرە كشانەوەیەك لە گوندەكان و بەرەكان شەڕ نییە و شارەكە ئابڵوقە دراوە.