فایگەن یوکسەکداغ، هاوسەرۆکی پێشووتری هەدەپە ڕایگەیاند، سەرەڕای ئەوەی یاسای چوارچێوە دەبێتە خاڵێکی دەستپێک، بەڵام لەبەرئەوەی بڕیارەکانی دادگای دەستووری و دادگای مافەکانی مرۆڤی ئەوروپا جێبەجێ ناکرێن و سیاسەتی قەیووم بەردەوامە، گومان لە نیەتی دەوڵەت بۆ چارەسەری هەیە.
یوکسەکداغ کە لە زیندانی جۆری ئێفی کاندیرادا زیندانییە، لە ڕێگەی پارێزەرەکانیەوە وەڵامی پرسیارەکانی ڕۆژنامەی (یەنی یاشام)ی دایەوە و هەڵسەنگاندنی بۆ پرۆسەی سیاسی، کێشەی کورد، مشتومڕەکانی دەستووری نوێ و پێویستیی تێکۆشانی هاوبەش کرد.
هاوسەرۆکی پێشووتری هەدەپە ئاماژەی بەوە کرد کە دەسەڵات پرۆسەکە تەنها لەسەر پرسی دانانی چەک تەنگ دەکاتەوە و هەنگاوی پێویستی دیموکراتیک نانێت، ئەوەش لە کاتێکدایە کە بڕیارەکانی دادگای مافەکانی مرۆڤی ئەوروپا و دادگای دەستووری پشتگوێ خستراون و سیستمی قەیووم بەردەوامە.
سەبارەت بە پرسی دەستووریش، یوکسەکداغ جەختی لەوە کردەوە کە دەستووری ئێستا خزمەت بە دەسەڵاتداران دەکات و پەیمانێکی کۆمەڵایەتی نییە، بۆیە هەر دەستوورێکی نوێ بێ مسۆگەرکردنی مافەکانی کورد و پاراستنی ئاسایشی کۆمەڵایەتیی باوەڕەکان، قبوڵکراو نابێت و پێویستە سەرنج بخرێتە سەر ئەو خاڵانەی کە کۆمەڵگە دەگەیەننە یەک.