وەزیری دەرەوەی ئێران ڕایگەیاند، هێزە چەکدارەکانیان هەمیشە ئامادەن بۆ بەرگریی و وڵاتەکەی لە بەرانبەر گوشارەکاندا هەرگیز پاشەکشە ناکات.
ئەمڕۆ هەینی، 8ـی ئایاری 2026، عەباس عێراقچی، وەزیری دەرەوەی ئێران، لە تۆڕی ئێکس پەیامێکی بڵاوکردەوە و تێیدا ئاماژەی بۆ ئەوە کردووە، نایانەوێت لە بەرانبەر گوشارەکانی ئەمریکا پاشەکشە بکەن.
دەشڵێت، هەرکاتێک نزیکبووبن لە چارەسەرێکی دیپلۆماسی، ئەمریکا پەنای بردووەتەبەر هێرشی سەربازیی.
وەزیری دەرەوەی ئێران گوتوشیەتی: "ئایا ئەمە تاکتیکە بۆ گوشارخستنەسەر ئێمە، یان فێڵە و تێکدەرێک دەیەوێت جارێکی دیکە جەنگ بەردەوام بێت".
عەباس عێراقچی، باسی لەوەش کردووە، هۆکارەکەی هەرچییەک بێت، وڵاتەکەی هەرگیز لەژێر گوشاردا سەر دانانەوێنێت، بەڵکو دیپلۆماسی دەبێتە قوربانی.