بۆ پاراستنی ژینگە و ڕێگریکردن لە کەوتنەوەی ئاگر، بڕیارە لە دوای کاتژمێر 11:00ی شەوەوە ڕێگە بە مانەوەی هاووڵاتییان و گەشتیاران لە شاخەکانی گۆیژە و ئەزمەڕ لە شاری سلێمانی نەدرێت.
سەرچاوەیەکی ئاگادار بە نووچە تیڤی ڕایگەیاند کە ئامانج لەم هەنگاوە، پاراستنی دارستان و پاوانی ناوچەکەیە لە مەترسیی ئاگرکەوتنەوە و ڕێگریکردنە لە بەرکەوتنی زیان بە سروشت و دار و ئاژەڵەکانی ئەو سنوورە.
بڕیارەکە لەلایەن بەڕێوەبەرایەتیی پاراستنی پاوان و دارستانی سلێمانییەوە دەرکراوە، لە ئێستاشدا قایمقامییەتی سلێمانی کۆبوونەوە لەسەر جێبەجێکردنی دەکات بۆ ئەوەی بە تەواوی بچێتە بواری جێبەجێکردنی فەرمییەوە.
هاوکات ڕێنمایی سەردانیکاران دەکرێت کە بە تەواوی ئاگاداری پاشماوەی ئاگری خەڵووز و جگەرەکانیان بن.
جێی ئاماژەیە لە ساڵانی ڕابردووشدا گرتنەبەری ئەم ڕێکارە ئەمنییە سروشتییە سوودێکی زۆری لە کەمکردنەوەی ڕووداوەکانی ئاگرکەوتنەوەدا هەبووە.