بەگوێرەی ڕاپۆرتێکی ئاژانسی هەواڵی ئەلئەحید، پارێزگای نەینەوا و بەتایبەت ناوچەی شنگال نیگەرانن لە بەردەوامی هەڕەشەکانی تورکیا و ئەگەری پەرەسەندنی هێرشەکانی تورکیا و کاریگەرییەکانیان لەسەر سەقامگیری و ئاوەدانکردنەوەی ناوچەکەیان.
ڕاپۆرتەکە باسی لەوە کردووە، دانیشتوانی دەڤەری شنگال و مەخموور ترسیان هەیە لە دووبارەبوونەوەی هێرش بۆ سەریان و داوای پاڵپشتی حکومەت دەکەن بۆ دەستەبەرکردنی ئاسایش و سەقامگیری ناوچەکەیان.
عەباس ئەلشاکی پەرلەمانتاری عێراق، لە لێدوانێکیدا بەشێک لە بەرپرسانی تورکیا بە دەستوەردان لە کاروباری عێراق تۆمەتبار دەکات و بە پێشێلکردنی ئاشکرای سەروەری وڵات و پەیماننامە نێودەوڵەتییەکان ناویدەبات.
ئەلشاکی دەشڵێت، پێویستە حکومەتی عێراق لە ڕێگەی کەناڵە دیپلۆماسی و یاساییەکانەوە هەڵوێستی یەکلاکەرەوە وەربگرێت.