بەهۆی ڕووداوێکی هاتوچۆوە سێ کەس گیانیان لەدەستدا

لە قەزای بەردەڕەش سەر بە پارێزگای دهۆک، بەهۆی ڕووداوەکەوە سێ کەس گیانیان لەدەستدا، کە یەکێکیان بوکێک بووە، چوار سەرنشینی دیکەش بریندار بوون.

پێش نیوەڕۆی ئەمڕۆ، لە قەزای بەردەڕەشی سەر بە پارێزگای دهۆک، ئۆتۆمبێلێکی جۆری (بی ئێم دەبلیو)، کە حەوت سەرنشینی تێدا بوو، لە نزیک بازگەی مەندان وەرگەڕا و کەوتە ناو ڕووباری خازرەوە.

 بەگوێرەی شایەتحاڵەکان، سەرنشینەکانی ئەو ئۆتۆمبێلە، بە مەبەستی خۆئامادەکردن بۆ ڕێوڕەسمی ئاهەنگی هاوسەرگیری لە ڕێگەدا بوون، بەڵام بەهۆی ڕووداوەکەوە سێ کەسیان گیانیان لەدەستدا، کە یەکێکیان خودی بووکەکە بووە، چوار سەرنشینەکەی تریش بریندار بوون.

 لەم بارەیەوە، عەقید هۆشیار عەبدوڵا، بەڕێوەبەری بەرگریی شارستانیی بەردەڕەش ڕایگەیاند، تیمەکانیان دەستبەجێ گەیشتوونەتە شوێنی ڕووداوەکە و تەرمەکانیان دەرهێناوە و بریندارەکانیشیان گواستووەتەوە. هاوکات پۆلیسی ناوچەکەش دەلێت، پەڕاوی لێکۆڵینەوەی بۆ زانینی هۆکاری دروستبوونی ڕووداوەکە کردووەتەوە.