بڕیاری خۆتان بدەن چیتان دەوێت  

ڕاپۆرتی/ کوردستان لەزگییەڤا

 دەوڵەتی تورکیا لە سەرەتای دەستپێکردنی پرۆسەی “کۆمەڵگەی ئاشتی و دیموکراسی” لە تورکیا و باکوری کوردستان، هەوڵی ئەوە دەدات گەلی کورد و ڕای گشتی قەناعەت پێبکات کە ئەوان هەموو پرۆسە بەڕێوەدەبەن و هەندێک هەنگاوی دیاریکراو دەگیرێتەبەر، بەڵام با تەمەشا بکەین بزانین چی هەیە و تا ئێستا چی کراوە.

 ئێمە وەک کۆمەڵگەی کورد و کوردستان دەزانین ئەم ھەنگاوە مێژووییە کە چارەنووسی گەلی کورد دیاری دەکات، لەلایەن دامەزرێنەری پەکەکە بەڕێز عەبدوڵا ئۆجالانەوە دەستیپێکراوە و سەرکردایەتی دەکات. هەموومان دەزانین سەرەڕای هەلومەرجی سەختی دوورگەی ئیمراڵی، ئۆجالان ئەم هەنگاوەی ناوە و جارێکی دیکە نەخشەڕێگایەکی بۆ کوردستان داڕشتووە.

شایەتحاڵی ئەوە بووین کە چۆن بانگەوازەکەی بۆ “کۆمەڵگەی ئاشتی و دیموکراتیک” لە ٢٧ی شوباتی ٢٠٢٥دا دەرچوو، دەستبەجێ لەلایەن خەڵکەوە پێشوازی لێکرا. ڕۆشنبیران، زانایان، نووسەران، سیاسەتمەداران و تەنانەت زۆرێک لە سەرکردە و پێشەنگەکانیش ئەم بانگەوازەیان بە تاکە چارەسەر بۆ تورکیا و بۆ نموونە بۆ ناوچەی ڕۆژهەڵاتی ناوەڕاست زانی.

 ئێستا لە سەردەمێکدا کە ڕۆژهەڵاتی ناوەڕاست خەریکە چارەنووسی خۆی لە قاڵب دەداتەوە، هەنگاوێکی لەو شێوەیە بە تایبەتی چانسێکە بۆ حکومەتی تورکیا و ڕێگەیەکی دەربازبوونە لەو ئاژاوەگێڕیەی لە وڵاتەکەیدا هەیە.

 ئەگەر ئەم هەنگاوە نەنرابایە، وەک هەموو گەلانی بەردەم گوشاری شەڕ، گەلی کورد لەسەر بنەمای ڕێبازی سێهەمی خۆی خەباتی بۆ بوون دەکرد و هەموومان دەزانین کە لەم جۆرە کاتانەدا بەرژەوەندی گەل لە سەرووی هەموو شتێکەوەیە. ئەمەمان لە نمونەی ڕۆژاڤادا بینی. هێرشەکانی سەر گەڕەکەکانی ئەشرەفییە و شێخ مەقسود، ڕۆحی نەتەوەیی گەلی کوردیان بەرزکردەوە بۆ لوتکە و دروشمی "یەکە یەکە، گەلی کورد یەکە، یەک کوردستان" بوو بە ناسنامەی کورد و کوردستان. ئێستا ئەم ناسنامەیە بەرەو یەکێتی نەتەوەیی دەڕوات و ئیتر کەس ناتوانێت ڕێگری لێبکات.

 لە کۆتاییدا نەورۆزی ئەمساڵ ئەو نەورۆزە بوو، کە هەموو سنوورەکانی لابرد و ئەو ئاگرانەی کە داگیرسێندرابوون توانەوە و ئەو سنوورانەی لەناوبرد کە لە مێشک و دڵیاندا چێندرابوون. کورد لە هەموو شوێنێک بە دروشمی کوردێکی ئازاد و کوردستانێکی ئارام، ئاگریان داگیرساند و هەموو گۆڕەپانەکانیان بە فەرهەنگی خۆیان ڕازاندەوە. بۆچی هێندە توڕە دەبن لەو ئاهەنگانە؟

 با سەیری زمانی حکومەتی تورکیا بکەین. هێشتا بە وشەی "تیرۆر" یان "ئیستفزازی" درێژە بە زمانی نەوەدەکانیان دەدەن. ئەوان جلوبەرگی نەتەوەیی دەکەنە بیانوو و لە زۆرێک لە شارەکانی باکوری کوردستان و تورکیا دەستیان بە دەستگیرکردن کردووە. ئێوە بەدوای چیدا دەگەڕێن و چیتان دەوێ؟

 دوێنێش قسەی برایانە و خوشکانە لە دەمتەوە کەمی نەبوو. ئایا ئێمە پێکەوە نەژیاین و هیچ کێشەیەک لە زمان و کولتوور و هونەری کوردیدا نەبوو. چی گۆڕاوە؟ بۆچی دیسان وشەکان کە بە ڕووی چەندین لێکدانەوەدا کراوەن لە دەمی ئەردۆغان و باخچەلی دێنە دەرەوە. ئەمە چ سیاسەتێکە و بۆچی سەقامگیری نییە. کەی بڕیار دەدەیت؟ کورد ئامادەیە بۆ شەڕ و ئاشتی، بەڵام دیارە تەنانەت نازانیت چیت دەوێت.

 گەلی کورد و بەتایبەت بزووتنەوەی ئاپۆیی، هەنگاوی زۆری ناوە و چەک لە بەردەم جیهاندا سووتێنرا و گروپەکان کشانەوە... بەڵام ئێوە نەتانبینیوە ئێمە وەک گەلی کورد چیمان کردووە. دەستگیرکردنی ئەو گەنجانەی پەیوەست بوون بە ئاهەنگی نەورۆزەوە، ئاگری ڕق و توڕەیی زیاتر دەکات و ئەگەر بەم شێوەیە بەردەوام بێت ئەم ئاگرە ناوەستێت و هەمووان دەسوتێنێت. کورد منداڵی ئاگر و خۆرە بۆیە هیچ ترسێکیان نییە.

 ئێوە بڕیاری خۆتان بدەن چیتان دەوێ...