کۆمەڵەی ڕۆژنامەنووسانی دیجلە و فورات ڕاپۆرتی پێشێلکارییەکانی مانگی نیسانی بڵاوکردەوە، تێیدا ئاماژە بە زیادبوونی گوشارەکان و سەپاندنی سزای قورس بەسەر ڕۆژنامەنووسان لە باکوری کوردستان و تورکیا دەکات.
کۆمەڵەی ڕۆژنامەنووسانی دیجلە و فورات لە ڕاپۆرتی مانگی نیساندا ڕایگەیاند، گوشار و پێشێلکارییەکان دژی ڕۆژنامەنووسان گەیشتووەتە ئاستێکی مەترسیدار و تەنها لە یەک مانگدا سێ ڕۆژنامەنووس دەستبەسەر کراون.
هەروەها ڕاپۆرتەکە ئاشکرای کردووە، لەو مانگەدا ڕۆژنامەنووسێک زیندانی کراوە و 10 ڕۆژنامەنووسی دیکەش بە تێکڕا 17 ساڵ زیندانییان بە سەردا سەپێنراوە. دەشڵێت، لە ئێستادا 31 ڕۆژنامەنووس لە زیندانەکاندان.
هەروەها دەڵێت، جگە لە گرتن و زیندانیکردن، سانسۆرێکی توند لە ئارادایە، بە جۆرێک ڕێگری لە دەستگەیشتن بە 29 هەواڵ و 18 ناوەڕۆکی سۆشیاڵ میدیا کراوە و سزای دارایی بەسەر 13 کەناڵدا سەپێنراوە.
کۆمەڵەکە جەخت دەکاتەوە، "ئازادیی ڕۆژنامەگەریی بناغەی دیموکراسییە و ئەو هەوڵانە بۆ بێدەنگکردنی دەنگی ڕاستین".