وەزارەتی خوێندنی باڵا و توێژینەوەی زانستیی حکومەتی هەرێمی کوردستان، بە فەرمی ڕۆژی چوارشەممەی داهاتووی وەک وادەی دەستپێکردنی پڕۆسەی گواستنەوە و دابەزینی خوێندکاران لە نێوان زانکۆکاندا بۆ ساڵی نوێی خوێندنی (2026-2027) دەستنیشان کرد.
بە گوێرەی ڕاگەیەندراوێکی فەرمیی وەزارەتەکە، ئەمڕۆ دووشەممە بڵاوکراوەتەوە، پڕۆسەی گواستنەوە و دابەزینی خوێندکاران (قوتابییان) لە ڕۆژی چوارشەممە ڕێکەوتی 15ـی تەمووز بە شێوازی ئەلیکترۆنی دەست پێ دەکات.
هاوکات لەگەڵ دەستپێکردنی پڕۆسەکەدا، تەواوی مەرج، ڕێنمایی و پێوەرەکانی تایبەت بە گواستنەوە و دابەزین بۆ ساڵی نوێی خوێندنی (2026-2027) بە شێوەی ئەلیکترۆنی دەخرێنە ڕوو.
وەزارەتی خوێندنی باڵا سەرجەم خوێندکاران ئاگادار دەکاتەوە کە بۆ ڕاپەڕاندنی مامەڵەکانیان و ئەنجامدانی پرۆسەی گواستنەوە و دابەزین، پێویست ناکات بە هیچ شێوەیەک سەردانی تەلاری وەزارەت یان دامودەزگاکانی بکەن، چونکە تەواوی پڕۆسەکە لە سەرەتاوە تا کۆتایی بە شێوازی ئەلیکترۆنی و لە ڕێگەی سیستمەوە بەڕێوەدەچێت.
وەزارەتی خوێندنی باڵا دەستپێکردنی پڕۆسەی گواستنەوە و دابەزینی خوێندکارانی ڕاگەیاند
