دوای گۆڕانکاری و ناجێگیریی سیاسی لە بەریتانیا، ئەندی بێرنهام سەرۆکی نوێی پارتی کرێکارانی بەریتانیا، بە شێوەیەکی فەرمی ئەرکی سەرۆکایەتیی وەزیرانی بەریتانیای گرتە دەست.
بە گوێرەی ڕاگەیەندراوێکی فەرمیی کۆشکی باکینگهام، ئەندی بێرنهام لە میانی ڕێوڕەسمی نەریتیی گواستنەوەی دەسەڵاتدا چاوی بە پاشا چارڵزی سێیەم کەوتووە و بە فەرمی ئەرکی پێکهێنانی حکومەت و وەزارەتی خەزێنەی لێ وەرگرتووە، کە ئەمەش دوای دەستلەکارکێشانەوەی کێر ستارمەر سەرۆکوەزیرانی پێشوو هات.
ئەندی بێرنهام، کە تەمەنی 56 ساڵە و پێشتر سەرۆکی شارەوانیی مانچستەر بووە، لەگەڵ هاوسەرەکەی گەیشتنە کۆشک و دواتریش چوونە بارەگای سەرۆکایەتیی حکومەت (ژمارە 10) لە شەقامی داونینگ لە لەندەن.
ئەندی بێرنهام دەبێتە چوارەمین سەرۆکوەزیران لە سەردەمی پاشایەتیی پاشا چارڵزی سێیەمدا، هاوکات حەوتەمین سەرۆکوەزیرانی بەریتانیایە لە ماوەی 10 ساڵی ڕابردوودا (لە ساڵی 2016ەوە)، ئەمەش ئاماژەیە بۆ ئاستی ئەو ئاڵۆزییە سیاسییانەی دوای چوونە دەرەوەی بەریتانیا لە یەکێتیی ئەوروپا ڕوویان لە وڵاتەکە کردووە.
ئەم گۆڕانکارییە دوای ئەوە هات کێر ستارمەر، کە لە تەمووزی 2024دا ببووە سەرۆکوەزیران، لە حوزەیرانی ڕابردوودا بەهۆی گوشارە سیاسی و ئابوورییەکانەوە دەستلەکارکێشانەوەی خۆی ڕاگەیاند.
ئەندی بێرنهام بە فەرمی بووە سەرۆکوەزیرانی بەریتانیا
