لە شاری قامیشلۆ، شارەوانیی گەل و کۆمپانیای ئارڤیۆن دوای شەش مانگ لە کارکردنی تاقیکردنەوە بۆ کۆکردنەوەی خۆڵ و خاشاکی شارەکە، بە فەرمی کۆتاییان بە گرێبەستەکەی نێوانیان هێنا.
ئەمڕۆ سێشەممە (12) ی ئایاری (2026)، شارەوانیی گەلی قامیشلۆ ڕایگەیاند، ئەو گرێبەستەی بەر لە شەش مانگ بۆ پاککردنەوەی شار لەگەڵ کۆمپانیای ئارڤیۆن واژۆ کرابوو، دوای گفتوگۆ و هەڵسەنگاندن، گەیشتووەتە کۆتایی و لەمەودوا شارەوانی خۆی ئەرکی کۆکردنەوەی خۆڵ و خاشاک دەگرێتە ئەستۆ.
شارەوانیی قامیشلۆ لە بارەی وردەکاریی بڕیارەکە بە میدیاکانی ڕاگەیاند، لە ڕێکەوتی (شەش) ی ئایاردا لەگەڵ کۆمپانیاکە گەیشتوونەتە ڕێککەوتن بۆ هەڵوەشاندنەوەی گرێبەستەکە و گوتییش: "ئێستا پڕۆسەی ڕادەستکردنەوەی کارەکان لە کۆمپانیاوە بۆ شارەوانی بەڕێوە دەچێت و هەر ئەوەیش هۆکاری سستیی پاککردنەوەی شار بووە لە چەند ڕۆژی ڕابردوو دا".
بەرپرسانی شارەوانی ڕایانگیاندیش: "لە ئەمڕۆوە شارەوانی بە شێوەیەکی ڕاستەوخۆ دەست بە کۆکردنەوەی خۆڵ و خاشاک دەکات و بۆ داهاتوویش گفتوگۆ لە سەر شێوازی جیاوازتر دەکەین بۆ ئەوەی خزمەتگوزارییەکان بە باشترین شێوە بگەنە هاوڵاتییان".
شارەوانیی قامیشلۆ جەختی لە ئەویش کردەوە: "تیمەکانمان لە دۆخی ئامادەباشی دان بۆ ئەوەی ئەو پاشماوانەی لە چەند ڕۆژی ڕابردوو دا لە گەڕەکەکان کۆ بوونەتەوە، بە زووترین کات لایان بەرن".