ئەندامی لیژنەی ئاسایشی نیشتمانیی و سیاسەتی دەرەوەی پەرلەمانی ئێرانی ڕایگەیاند، لێکەوتە و کاریگەرییەکانی شەڕی ئابووری و سزاکانی ئەمریکا لە هێرشە سەربازییەکان زۆر زیاتر و مەترسیدارترن.
فەداحسێن مالیکی، لە لێدوانێکدا بە ئاژانسی هەواڵی خانەی میللەتی گوتووە، بە پێچەوانەی شەڕی سەربازییەوە کە دەکرێت ڕەوتی زیانەکانی لە داهاتوودا کەم بکرێتەوە، شەڕی ئابووری کاریگەرییەکی درێژخایەنتری هەیە و زیانەکانی بە شێوەی ڕاستەوخۆ کار دەکاتە سەر ژیانی هاوڵاتییان.
ئەمە لە کاتێکدایە دوێنێ ئەمریکا گوشارە ئابوورییەکانی بۆ سەر ئێران زیاتر کرد و ڕایگەیاند، هەر وڵاتێک مامەڵە لەگەڵ ئێران بکات لە بازاڕەکانی جیهان دەردەکرێت و تووشی سزا دەبێت.
بە گوێرەی ئامارەکان گەمارۆی دەریایی ئەمریکا ڕۆژانە زیاتر لە 500 ملیۆن دۆلار زیان بە ئابووریی ئێران دەگەیەنێت و هەناردەی نەوت وەک گرنگترین سەرچاوەی داهاتی ئێران گەیشتووەتە نزیکەی سفر.