وەزارەتی ناوخۆی ئیسپانیا ئاماری نوێی سەبارەت بە هەوڵی بەکۆمەڵی کۆچبەرانی نایاسایی بۆ پەڕینەوە لە مەغریبەوە بۆ ناوچەی سێوتای سەر بە ئیسپانیا ڕاگەیاند، بە گوێرەی ئامارە نوێیەکان، ژمارەی ئەو کۆچبەرانەی لە کاتی پەڕینەوەیاندا گیانیان لەدەستداوە بۆ 67 کەس بەرز بووەتەوە.
ئاژانسی هەواڵی ئیفێی ئیسپانی لە زاری سەرچاوە ئەمنییەکانەوە بڵاوی کردەوە، لە ماوەی 30 کاتژمێری ڕابردوودا نزیکەی 69 هەزار و 500 کۆچبەر، کە پێشتر پەڕیبوونەوە بۆ خاکی ئیسپانیا، گەڕێنراونەتەوە بۆ مەغریب. دەسەڵاتدارانی ئیسپانیا ئاماژەیان بەوەش کردووە، لە کاتی شەواندا هیچ هەوڵێکی نوێی پەڕینەوە بۆ وڵاتەکەیان تۆمار نەکراوە.
ئەمەش لە کاتێکدایە، لە ڕۆژی پێنجشەممە 30ی تەممووز زیاتر لە 800 کۆچبەر لە شارۆچکەی فەنیدەقی مەغریبەوە لە ڕێگەی مەلەکردنەوە هەوڵیان دا بچنە ناو سێوتا لە ئیسپانیا. لە بەرامبەردا، پێدرۆ سانچێز، سەرۆکوەزیرانی ئیسپانیا ڕایگەیاند، سەرجەم تواناکانی حکومەتی بۆ ڕووبەڕووبوونەوەی قەیرانەکە خستووەتە گەڕ و سوپای وڵاتەکەشی لە ناوچە سنوورییەکان جێگیر کردووە.
ئێستا لە دەروازەی سنووریی «تاراجال» لە سێوتا، دەسەڵاتدارانی ئیسپانیا دەستیان بە دروستکردنی بەربەستی نوێ و بەهێزکردنی ڕێکارە ئەمنییەکان کردووە تاوەکو ڕێگە لە دووبارەبوونەوەی هەوڵی پەڕینەوەی بەکۆمەڵ بگرن.
گەرانەوەی کۆچبەران لە ئیسپانیاوە بۆ مەغریب بەردەوامە؛ ژمارەی گیانلەدەستدان گەیشتە 67 کەس
