دوای زیاتر لە دەیەیەک دابڕان، دانیشتووانی شاری مووسڵ بۆ ئەنجامدانی نوێژی جەژن ڕوویان لە مزگەوتی مێژوویی و نۆژەنکراوەی نەبی یونس کردەوە.
عەبدوڵڵا سۆفی پێشنوێژ و گوتارخوێنی مزگەوتی نەبی یونس، لەبارەی بەڕێوەچوونی مەراسیمەکەوە ڕایگەیاند، لێشاوێکی فرەوان لە خەڵکی ناوچەکە و تەنانەت دەرەوەی شاری مووسڵیش بۆ ئەنجامدانی یەکەمین نوێژی جەژن لە دوای نۆژەنکردنەوەی مزگەوتەکە ئامادە بوون، گوتیشی: "ئەم مزگەوتە لە ساڵی 2014 لەلایەن داعشەوە خاپوور کرا و لە نیسانی ئەمساڵدا بە ڕووی نوێژخوێناندا کرایەوە، بۆیە ئێمە ئەمڕۆ دوو جەژنمان هەبوو، یەکێکیان جەژنی قوربان و ئەوی دیکەیان جەژنی کردنەوەی ئەم مزگەوتە پیرۆزەیە".
لە پاڵ ئەمەشدا، هاووڵاتییەکی شاری مووسڵ لەبارەی جیاوازیی کەشی جەژنی ئێستا بەراورد بەو سێ ساڵەی شارەکە لە ژێر دەستی چەکدارانی داعشدا بوو ڕایگەیاند: "دۆخەکە زۆر خۆشە و منداڵەکانمان خۆشی دەبینن، هەرچەندە پلەی گەرما بەرزە، بەڵام لایەنی کەم ئەگەر ئێمە کاتی خۆی باش نەژیاوین، با منداڵەکانمان لەمەودوا خۆش بژین".