سەرۆک ترەمپ و یاریدەدەرە باڵاکانی خەریکی تاوتوێکردنی پلانێکن بۆ لێدانی گورزی سەربازیی سنوردار لە گەرووی هورمز، بە مەبەستی ڕێگری لە ئێران لە دووبارە ڕێکخستنەوە و بەهێزکردنەوەی تواناکانی ڕادار و مووشەکییەکانی کە بۆ ئامانجگرتنی کەشتییەکان بەکاریان دەهێنێت.
لە کاتێکدا ئەم پلانە لەلایەن فەرماندەیی ناوەندیی ئەمریکا (سێنتکۆم) لە هەفتەی ڕابردوودا داڕێژراوە و لەلایەن پیت سێگس وەزیری بەرگری پاڵپشتیی لێکراوە، پێش ڕووداوەکانی کۆتایی هەفتە لەلایەن ترەمپەوە پەسند نەکرابوو، بەڵام بە گوتەی بەرپرسانی ئەمریکا، ئاڵۆزییە نوێیەکان ڕەنگە هانی سەرۆکی ئەمریکا بدەن گڵۆپی سەوز بۆ جێبەجێکردنی دابگیرسێنێت. ئامانجی سەرەکی لەم کەمپینە، کەمکردنەوەی مەترسییەکانی سەر کەشتییە نەوتییەکان و کەشتی و فڕۆکە جەنگییەکانی ئەمریکایە لە ڕێگەی لاوازکردن و پەکخستنی بەردەوامی تواناکانی تاران.
دواکارییە ئەمنییەکان دوای ئەوە هاتن، کە لە دوو مانگی ڕابردوودا سوپای ئەمریکا توانی لە ڕێگەی پاککردنەوەی مینەکان و هاوڕێیەتیکردنی کەشتییەکان، کۆنترۆڵی بەشێکی زۆری تەنگەکە بکات و هەناردەی نەوت بەردەوام بکات. بەڵام نیشانە نوێیەکان، لەوانە هاوێشتنی مووشەکێکی دژەفڕۆکەی ئێرانی بەرەو فڕۆکەیەکی جەنگیی F-35ی ئەمریکی لە ناوچەکەدا، مەترسییەکانی سێنتکۆمی زۆرتر کردووە، کە تاران هەوڵی نۆژەنکردنەوەی سیستمی بەرگریی ئاسمانی و مووشەکیی دەدات، ئەوەش پێویستیی وەشاندنی گورزی خولیی بۆ پاراستنی هێڵەکانی کەشتیوانی بەهێزتر کردووە.
کۆشکی سپی پێشتر دوودڵ بوو لە پەسندکردنی هێرشەکان تاوەکو ڕێگە لە پەرەسەندنی ئاڵۆزییەکان بگرێت، بەڵام هێرشە مووشەکییەکانی ڕۆژی یەکشەممەی ئێران بۆ سەر بنکەکانی ئەمریکا لە ئوردن، کە وەک وەڵامێک بوو بۆ بۆردوومانکردنی ئەو هێزە ئێرانییانەی ئامادەکارییان بۆ چاندنی مین دەکرد پێدەچێت بڕیارەکانی واشنتن بگۆڕێت. ترەمپ بەیانی ڕۆژی دووشەممە بە تۆڕی فۆکس نیوزی ڕاگەیاند کە ئەمریکا وەڵامی هێرشەکانی ئێران دەداتەوە و بە توندی لێیان دەدات.
ئەمریکا تاوتوێی لێدانی گورزی نوێ لە گەرووی هورمز دەکات
