فەرماندەیی ناوەندیی ئەمریکا (سێنتکۆم) لە ڕاگەیەندراوێکدا بە ناوی ئەدمیراڵ براد کوپەر ڕایگەیاند، لە نێوان 11 کەشتیی جەنگیی فڕۆکەهەڵگری چالاکی وڵاتەکەیاندا، کەشتیی «ئیبراهیم لینکۆڵن» کەمترین ڕێژەی کێشە و ئاریشەی تەندروستیی دەروونیی تێدا تۆمارکراوە.
ئەدمیراڵ کوپەر لە میانی سەردانەکەی بۆ سەر کەشتییەکە، ئاماژەی بەوە کرد، بینینی هاوکاری، کاری بەکۆمەڵ و خۆڕاگریی ستاف و دەریوانان لەسەر کەشتییەکە جێگەی شانازییەکی گەورەیە.
فەرماندەیی ناوەندیی ئەمریکا جەختی لەوەش کردەوە کە ئەم ئامارە مانای نەبوونی کەموکورتی یان ئاڵەنگاری نییە، چونکە خزمەتکردنی درێژخایەن لە دەریادا گوشاری تایبەتی خۆی هەیە و ڕووبەڕووبوونەوەی ڕەوشەکە لە کەسێکەوە بۆ کەسێکی تر جیاوازە.
ڕاگەیەندراوەکەی سێنتکۆم ستایشی سەرکردایەتیی کەشتییەکەی کردووە بۆ بایەخدان بە تەندروستیی دەروونیی هێزەکان و هیوای گەڕانەوەیەکی سەلامەتی بۆ کەشتیوانان خواستووە، ئەوەش لە کاتێکدایە کە پێشتر دەنگۆی بوونی حاڵەتی زۆری تێکچوونی دەروونی و خراپیی خواردنی سەربازەکان بەهۆی مانەوەیان بۆ ماوەیەکی درێژ لە دەریادا بڵاوبوو بوەوە.
سێنتکۆم: کەشتیی ئیبراهیم لینکۆڵن کەمترین حاڵەتی دەروونیی تێدا تۆمارکراوە
