شێڤال دیجلە ئاکای، ئەندامی ئەنجوومەنی گەنجانی پارتی یەکسانی و دیموکراسیی گەلان (دەم پارتی) لە لێدوانێکدا سەبارەت بە پڕۆسەی ئاشتی ڕایگەیاند، پێویستە ژنانی گەنج لە بری ئەوەی تەنیا وەک لایەنێکی بینەر یان نوێنەرایەتییەکی شکڵی بن، ببنە پێشەنگ و کاراکتەری سەرەکیی داڕشتنی ئاراستەی ئەم پڕۆسەیە.
"ئاشتی پێویستی بە هەنگاوی بوێرانە و کۆنکرێتی هەیە"
ئاکای ئاماژەی بەوە کرد کە قۆناغی ئێستای پڕۆسەی ئاشتی و کۆمەڵگەی دیموکراتیک، دەرفەتێکی مێژووییە بۆ گەلی کورد و سەرجەم گەلانی ڕۆژهەڵاتی ناوەڕاست، بەو پێیەی ئامانجی دروستکردنی فەزایەکی سیاسیی دیموکراتیکە لە جیاتی توندوتیژی.
ناوبراو ڕەخنەی لە سستیی هەنگاوەکان گرت و وتی: "لەم قۆناغەدا دەبینین زەمینەیەکی نوێ بۆ ئاشتی هاتووەتە ئاراوە، بەڵام ئەگەر هەنگاوی کۆنکرێتی (دیار و بەرجەستە) و بوێرانە نەنرێت و لێپرسینەوەیەکی مێژوویی ئەنجام نەدرێت، ئەوا هەنگاوەکان بێ مانا دەبن. نەبوونی هەنگاوی کرداری تاوەکو ئێستا، نیشانەی ئەوەیە کە پڕۆسەکە بە شێوازێکی یەک لایەنە بەڕێوە دەچێت."
ڕۆڵی ژنانی گەنج؛ نەک وەک پاشکۆ، بەڵکو وەک پێشەنگ
ئەندامەکەی ئەنجوومەنی گەنجانی دەم پارتی تیشکی خستە سەر پێویستیی بەشداریی ڕاستەقینەی ژنان و گوتی:
"مێژوو پێمان دەڵێت کە یەکەم چەوساندنەوە لەسەر بنەمای ڕەگەزی بووە. پێویستە ئەوە بیر بهێنینەوە کە ژنان لەم پڕۆسەیەدا هاوکارێکی لاوەکی یان پاشکۆ نین، چونکە ژیان و ئازادی بەبێ ژنان مەحاڵە.
ئێمە وەک ئەو گەنجانەی لە ناو جەرگەی شەڕ و ململانێکاندا گەورە بووین، نامانەوێت تەنیا تەماشاکەر بین، بەڵکو دەمانەوێت مۆدێلێکی نوێی ژیانی یەکسان، ئازاد و دادپەروەرانە بونیاد بنێین."
داواکاریی گەنجانی دەم پارتی بۆ گۆڕینی پڕۆسەی ئاشتی لە ڕێککەوتنێکی سیاسیی سەرەوە بۆ پڕۆسەیەکی کۆمەڵایەتیی بنکەفراوان، نیشانەی ڕەوتی نوێی ناو سیاسەتی باکووری کوردستانە.
جەختکردنەوە لەسەر ڕۆڵی ژنانی گەنج، ڕەنگە ببێتە هۆی دروستبوونی گوشارێکی زیاتر لەسەر لایەنە فەرمییەکانی تورکیا بۆ ئەوەی لە کاتی داڕشتنی هەر ڕەشنووسێکدا، ڕەهەندە کۆمەڵایەتی و جێندەرییەکان فەرامۆش نەکەن.