ڕۆژنامەی واشنتن پۆستی ئەمریکی لە ڕاپۆرتێکدا ئاماژەی بەوە کردووە، پەیوەندییەکانی نێوان ئەمریکا و ئێران بە جۆرێک ئاڵۆز بوون، کە هەردوو وڵات زۆر نزیک بوونەتەوە لە بەرپابوونی جەنگێکی بەرفراوان و کارەساتبار.
بە گوێرەی زانیارییەکانی ڕۆژنامەکە، لەگەڵ بەردەوامیی پێکدادانە سەربازییەکان، هێرشە مووشەکی و درۆنییەکان و بەرزبوونەوەی ژمارەی کوژراو و زیانەکان، ئاستی ئاڵۆزییەکان لە ڕادەبەدەر زیادی کردووە.
واشنتن پۆست لە زاری بەرپرسێکی باڵای سوپای ئەمریکاوە بڵاویکردووەتەوە، پێنتاگۆن ژمارەی کەشتی و فڕۆکە جەنگییەکانی لە ناوچەی ڕۆژهەڵاتی ناوەڕاست زیاتر کردووە و هێزەکانی لە ئامادەباشیی تەواودان. لەلایەکی دیکەوە، بەڕێوەبەری توێژینەوە سەربازییەکان لە پەیمانگەی واشنتن ڕایگەیاندووە، لە حاڵەتی ئەنجامدانی ئۆپەراسیۆنی زەمینی لە ناو خاکی ئێراندا، هێزەکانی ئەمریکا ڕووبەڕووی مەترسیی گەورەی مووشەک و درۆنە خۆکوژەکانی ئێران دەبنەوە.
محەمەد باقر قالیباف، سەرۆکی پەرلەمانی ئێران، هۆشداریی دایە ئەمریکا و ڕایگەیاند، وڵاتەکەی لە جووڵە سەربازییەکانی ئەمریکا و ڕەوانەکردنی هێزی زیاتر بۆ ناوچەکە ئاگادارە. ناوبراو جەختی لەوە کردەوە، ئەم هەنگاوانەی ئەمریکا ئاماژەن بۆ ئامادەکاری بۆ جەنگ نەک ڕێگەخۆشکردن بۆ ئاشتی.
واشنتن پۆست هۆشداری لە فراوانبوونی جەنگی نێوان ئەمریکا و ئێران دەدات
