پرسی گەرووی هورمز و جووڵەی کەشتیگەلە نێودەوڵەتییەکان، جارێکی دیکە پەیوەندییەکانی نێوان ئەمریکا و ئێرانی بەرەو گرژییەکی نوێ بردووە. بەپێی نوێترین زانیارییەکانی میدیا ئەمریکییەکان، واشنتن دەیەوێت پارە بلۆککراوەکانی ئێران لە دەرەوە وەک کارتێکی فشار بەکاربهێنێت بۆ ڕێگریکردن لە پلانێکی سوپای پاسدارانی ئێران، کە دەیەوێت بە ناوی "پاراستنی ژینگە و دابینکردنی ئاسایش"، باج و سەرانە بەسەر کەشتییە بازرگانییەکاندا بسەپێنێت لەو گەرووە نێودەوڵەتییەدا.
سندوقی هورمز؛ باجێکی شاراوە؟
لە ڕێگەی نێوەندگیریی عومانەوە، پێشنیازێک گەڵاڵە کراوە بۆ دروستکردنی "سندوقێکی دارایی" بۆ دابینکردنی خزمەتگuzارییەکانی دەریاوانی و ژینگە لە گەرووی هورمز، کە تێیدا ئەو کەشتی و کۆمپانیایانەی بەوێدا تێپەڕدەبن، هاوکاری دارایی پێشکەش بە سندوقەکە بکەن.
بەڵام ئەمریکا ئەم هەنگاوە بە مەترسی دەزانێت و پێی وایە ئەمە تەنها "باجێکی شاراوەیە" و دەبێتە هۆی ئەوەی سوپای پاسداران گەرووەکە بکاتە سەرچاوەیەکی دارایی و فشاری ئەمنی. سەرچاوەیەکی بەرپرس لە وەزارەتی دەرەوەی ئەمریکا بە وۆڵ ستریت جۆرناڵ ڕاگەیاندووە: "واشنتن بە نێوەندگیرەکانی گوتووە کە هیچ جۆرە باج و سەرانەیەک لەلایەن ئێرانەوە لە گەرووی هورمز قبووڵکراو نییە." لەبەرامبەردا، ئەمریکا ئامادەیە بەشێک لە پارە بلۆککراوەکانی ئێران لە قەتەر ئازاد بکات، بەو مەرجەی تەنها بۆ کڕینی کاڵای مرۆیی و بازرگانیی دیاریکراو بێت و نەچێتە دەستی سوپای پاسداران.
مەرجە پێشوەختەکانی واشنتن پێش ئازادکردنی پارەکان
ڕۆژنامەی "وۆڵ ستریت جۆرناڵ" بڵاویکردووەتەوە کە قەبارەی پارە بلۆککراوەکانی ئێران لە دەرەوە بە نێزیکەی 100 ملیار دۆلار دەخەمڵێنرێت. جی دی ڤانس، جێگری سەرۆکی ئەمریکا ڕایگەیاندووە کە وڵاتەکەی بە هیچ شێوەیەک ڕێگە نادات تاران باج بەسەر کەشتییەکاندا بسەپێنێت.
ئەمریکا دەیەوێت ئازادکردنی هەر بڕە پارەیەک ببەستێتەوە بە بەڵێننامەی جێبەجێکراوەوە لەلایەن تارانەوە، کە گرنگترینیان بریتین لە:
ڕەتکردنەوەی باج: نەسەپاندنی هیچ جۆرە باج یان سەرانەیەک لە گەرووی هورمز.
ئاسایشی کەشتیوانی: ڕاگرتنی دەستبەسەرداگرتنی کەشتییە بازرگانییە نێودەوڵەتییەکان.
کەمکردنەوەی هەژموون: هیچ ڕێڕەوێکی دەریایی نێودەوڵەتی نابێت سوپای پاسداران دەسەڵاتی ڕەهای بەسەردا هەبێت.
درز لە ناوخۆی ئێراندا؛ ململانێی پزیشکیان و سوپای پاسداران
ستراتیژییە نوێیەکەی ئەمریکا لەسەر بنەمای قۆستنەوەی جیاوازییەکانی ناوخۆی ئێران داڕێژراوە. ڕاپۆرتەکان ئاماژە بەوە دەکەن کە لە ناوخۆی ئێراندا دوو بۆچوونی جیاواز لەسەر ئەم پرسە هەیە:
حکومەتەکەی مەسعود پزیشکیان کار بۆ ئەوە دەکات 6 ملیار دۆلاری بلۆککراوی وڵاتەکەی لە قەتەر ئازاد بکات بۆ ڕزگارکردنی ئابوورییە داڕماوەکەی ئێران، بەڵام لە بەرامبەردا سوپای پاسداران گوێ بەم پێویستییە داراییە نادات و تەنها جەخت لەسەر کۆنترۆڵی سەربازیی گەرووی هورمز و سەپاندنی باج دەکاتەوە.