بەڕێوەبەرایەتیی بەرگریی شارستانیی سلێمانی ئاماری ڕووداوەکانی مانگی ڕابردووی ڕاگەیاند، بەپێی ئامارەکە لەو ماوەیەدا دەیان ڕووداوی ئاگرکەوتنەوە و هاتوچۆ لە سنوورەکەدا تۆمارکراون کە بەهۆیانەوە چەندین کەس گیانیان لەدەستداوە و بریندار بوون، زیانە داراییەکانیش بە سەدان ملیۆن دینار دەخەمڵێندرێن.
بەرگریی شارستانیی سلێمانی لە ڕاگەیێندراوێکدا بڵاویکردەوە، لە ماوەی مانگێکدا 92 ڕووداوی ئاگرکەوتنەوە و 70 ڕووداوی جۆراوجۆر لە چەند ناوچەیەکی جیاوازی سنوورەکەدا ڕوویانداوە.
بەگوێرەی ڕاگەیێندراوەکە، زۆرترین ڕووداوەکان پەیوەست بوون بە ئاگرکەوتنەوە، کە بەمشێوەیە دابەشبوون:
ئاگری ماڵان: 32 ڕووداو
ئاگری ئۆتۆمبێل: 21 ڕووداو
ئاگری شوێنی بازرگانی: 9 ڕووداو
ئاگری ماتۆڕسکیل: 2 ڕووداو
جگە لە ڕووداوەکانی ئاگرکەوتنەوە، لەو ماوەیەدا پێنج ڕووداوی هاتوچۆ و چوار ڕووداوی ڕزگارکردن لە کەوتنەخوارەوە تۆمارکراون، لەگەڵ سێ حاڵەتی خنکان و ڕزگارکردن لە ئاودا.
سەبارەت بە زیانە گیانی و داراییەکان، بەرگریی شارستانیی سلێمانی ئاماژەی بەوە کردووە کە بەهۆی ئەو ڕووداوانەوە، سێ هاونیشتمانی گیانیان لەدەستداوە و 35 کەسی دیکەش بریندار بوون؛ هاوکات قەبارەی زیانە داراییەکانیش بە 400 ملیۆن دینار خەمڵێندراوە.