ڕێکخراوی پەیامنێران بۆ ماف و گەشەپێدان ڕاپۆرتی شەش مانگی یەکەمی ساڵی 2026ی لەسەر دۆخی ئازادیی ڕۆژنامەنووسی لە هەرێمی کوردستان بڵاوکردەوە و تێیدا ئامارێکی نوێی پێشێلکارییەکانی خستە ڕوو.
بە گوێرەی ڕاپۆرتەکەی ڕێکخراوی پەیامنێران، لە ماوەی شەش مانگی ڕابردوودا 36 پێشێلکاریی جۆراوجۆر دژی ڕۆژنامەنووسان و دەزگاکانی ڕاگەیاندن لە هەرێمی کوردستان تۆمارکراون.
ڕێکخراوەکە لە ڕاپۆرتەکەیدا جۆری پێشێلکارییەکانی بەم شێوەیە پۆلین کردووە: "26 حاڵەتی ڕێگری و پێشێلکاری بەرامبەر تیمەکانی ڕاگەیاندن لە کاتی ڕووماڵکردنی ڕووداوەکاندا تۆمارکراون، هەروەها چوار حاڵەتی تۆمارکردنی سکاڵای یاسایی دژی ڕۆژنامەنووسان هەبووە، لەگەڵ ئەوەشاد سێ حاڵەتی دەستبەسەرکردن و دەستگیرکردنی ڕۆژنامەنووسان لە کاتی ڕاپەڕاندنی ئەرکەکانیاندا تۆمارکراوە، دوو حاڵەتی داخستنی کەناڵی میدیاییش لەم ماوەیەدا ڕوویانداوە".
ڕێکخراوی پەیامنێران بۆ ماف و گەشەپێدان لە بەشێکی گرنگی ڕاپۆرتەکەیدا هۆشداریی توندی دایە خودی دەزگاکانی ڕاگەیاندن لە هەرێمی کوردستان.
ڕێکخراوەکە داوای کرد، پێویستە میدیاکان پابەندی تەواوی ئیتیکی کاری ڕۆژنامەنووسی بن و هۆشداری دا لەوەی: "هەندێک لە دەزگا میدیاییەکان لە کاتی ڕوودانی ڕووداوە نائاسایی و ئەمنییەکاندا (کە ئاماژەیە بۆ هێرشە مووشەکی و درۆنییەکانی ئەم دواییەی سەر هەولێر و سلێمانی)، بنەما و ئیتیکی پیشەیی پێشێل دەکەن".
ڕێکخراوەکە داوای کرد لە پێناو بەرژەوەندیی گشتی و پاراستنی ڕاستگۆیی ڕۆژنامەنووسی، میدیاکان دوور بکەونەوە لە شێواندنی ڕاستییەکان و بڵاوکردنەوەی زانیاریی ناڕاست لە کاتی قەیرانەکاندا.
ڕێکخراوی پەیامنێران: لە شەش مانگدا 36 پێشێلکاری دژی ڕۆژنامەنووسان ئەنجام دراون
