قوباد تاڵەبانی ڕایگەیاند کە بەشێک لەو بەربەستانەی لەبەردەم پێکهێنانی کابینەی نوێی حکومەتی هەرێمی کوردستاندا هەبوون نەماون، و هیوای خواست لەم پایزەدا حکومەتی نوێ پێک بێت.
لە لێدوانێکی ڕۆژنامەوانیدا، قوباد تاڵەبانی سەبارەت بە دواین پێشهاتەکانی تایبەت بە پێکبهێنانی کابینەی داهاتووی حکومەت ئاماژەی بەوە دا کە "بەربەستی کەم ماون لەبەردەم پێکهێنانی حکومەتدا".
ناوبراو هەروەها لەبارەی بەشداریپێکردنی لایەنەکانەوە ڕوونی کردەوە که پرسی بەشداریکردن یان نەکردنی جووڵانەوەی نەوەی نوێ لە حکومەتدا پەیوەندی بە بڕیاری خۆیانەوە هەیە.
لە کۆتایی لێدوانەکەیدا، قوباد تاڵەبانی جەختی لەوە کردەوە کە هیوادارە پڕۆسەکە بە سەرکەوتوویی کۆتایی پێ بێت و لەم وەرزی پایزەدا کابینەی نوێی حکومەتی هەرێمی کوردستان پێک بێت.