مەسرور بارزانی، سەرۆکی حکومەتی هەرێمی کوردستان، هێرشە درۆنی و موشەکییەکانی ئەم دواییەی سەر هەرێمی کوردستانی بە توندی شەرمەزار کرد و ڕایگەیاند کە هیچ پاساوێک بۆ ئەو پەلۆمارانە نییە، هاوژەمەن داواشی کرد پەرلەمانی کوردستان نەکرێتە بارمتە و کارا بکرێتەوە.
سەرۆکی حکومەتی هەرێمی کوردستان، لە کاتی پێشکەشکردنی گوتارێکدا لە ڕێوڕەسمی کردنەوەی پڕۆژەی ستراتیژیی ئاوی باڵندا-بارزان، تیشکی خستە سەر بارودۆخی سیاسی و ئەمنیی هەرێمی کوردستان، عێراق و ناوچەکە.
ئەو ڕووی دەمی کردە لایەنە سیاسییەکانی ناوخۆی هەرێم و گوتی: "لە دۆخێکی ناسکی وەکو ئێستادا، پێویستە لایەنەکان بۆ چارەسەرکردنی کێشەکان بێنە پێشەوە."
مەسرور بارزانی جەختی لەوەش کردەوە کە هەرێمی کوردستان نایەوێت ببێتە بەشێک لە جەنگ و ململانێکانی ناوچەکە، ئەگەرچی زۆر جار بەهۆی ئەو گرژییانەوە زیانی پێگەیشتووە.
هاوکات داوای کرد کە دەستووری عێراق وەک خۆی و بێ جیاوازی جێبەجێ بکرێت بۆ پاراستنی مافەکانی هەموو لایەک.