وەزارەتی ناوخۆی هەرێمی کوردستان ڕێنماییەکی نوێی دەرکرد و تێیدا مۆڵەتی شۆفێریی دیجیتاڵی لەسەر ئامێرە زیرەکەکان پەسەند کرد، کە خاوەنی هەمان بەهای یاسایی کارتی فیزیکی دەبێت.
بەگوێرەی بڕیارەکە، لەمەودوا خستنەڕووی مۆڵەتی شۆفێری بە دوو شێوازی فیزیکی و دیجیتاڵی دەبێت، و وەشانە دیجیتاڵییەکەش لە ڕێگەی سەکۆی (KRDpass)ـەوە لەسەر مۆبایل و تابلێت بەردەست دەبێت بە سەرجەم خەسڵەتە ئەلیکترۆنی و نیشانە تەکنیکییەکانەوە.
ئەم هەنگاوە لە چوارچێوەی بەئەلیکترۆنیکردنی خزمەتگوزارییەکاندا دێت و ئاسانکارییەکی گەورەیە بۆ شۆفێران، بە جۆرێک کە لە کاتی لێخوڕیندا پێویست ناکات هەمیشە کارتی فیزیکییان پێ بێت و وەشانە دیجیتاڵییەکە لەبەردەم هێزەکانی هاتووچۆدا هەمان پێگەی یاسایی دەبێت.